Ka ïingbishar jong i kong P. Syngkon, Special Judge (POCSO), West Jaiñtia Hills District, ha ka 18 tarik Nailar 2026, ka la rai pynrem ia u Salwi Shadap, na ka Shnong Ionglwit, West Jaintia Hills, ha kaba ia dei bad ka kam batbor ia ka khynnah rit kaba dang 13 snem ka rta ha u snem 2022.
Katkum ka jingujor la iathuh ba ha ka 15 tarik u Kyllalyngkot, 2022, ha ka por kumba 12:30 baje nohphai sngi, utei u Salwi Shadap u la rung shapoh ïing jong katei ka khynnah, katba ka kmie jong ka ka dang don shabar ban leit sha ka jingïalang. Da kaba mynleh pan um dih, hynrei u la khynniat ia katei ka khynnah shapoh jaka sum bad ula lehbeijot ia ka hapoh katei ka kamra. Kane ka jingjia ka la paw ha ka 26 tarik u Kyllalyngkot, 2022, hadien ba ka kmie jong katei ka khynnah ka la lap ïa ki jaiñ jong ka kiba bit snam. Hadien kata la register case ha thanat Nartiang katkum ka Case No. 6(1)2022 hapoh ka kyndon 3(a)/4 jong ka aiñ ïada ïa ki khynnah na ki kam leh beijot (POCSO). Ia kane ka kam la tohkit bad pynngat mukotduma da ka WPSI kong I. Dkhar.
Hadien ba ka ïingbishar kala dep ia ki jingtohkit la lap sabut ba une u Salwi Shadap u donkti ha kane ka kam lehbeijot kumta ula shah rai pynrem noh da kaba shah set along haduh 20 snem ryngkat bad ka kuna kaba Rs.10,000/- (Shiphew hajar) tyngka.
Kane ka long katkum ka khubor ba la pyllait da u Superintendent of Police, West Jaintia Hills, Jowai.