Ia ka subject ha ka ktien Khasi bad Garo la pynrung ha ka Central Board of Secondary Education (CBSE), kaba ailad ia ki skul kiba iasoh bad katei ka board ban pynrung ia kitei ki ar tylli ki ktien kum ki subjeck ba lah ban jied (optional third-language subjects) naduh ka samoi pule jong u snem 2026-27.
Ka thup ba la pynthymmai jong ki ktien kiba lah ban ioh ha ka portal jong ka CBSE OASIS ka kynthup ia ka Khasi bad Garo hapoh ka rukom hikai ba dang shu shim thymmai ha ki lai tylli ki ktien ba la wanrah hapoh ka National Education Policy (NEP) bad ka National Curriculum Framework (NCF).
Kane ka rai ka wan hadien ka jingshimkhia na ka jylla Meghalaya haba baroh ar tylli ki ktien ki shym la pynrung nyngkong ha ka thup jong ka CBSE kumba la pynbna mynshwa.
Na ka liang ka sorkar Meghalaya ka la leit ban iakynduh bad ki heh jong ka CBSE bad ka la pynbor ia kane ka Board ban kynthup lang ia ki ar tylli ki ktien thaiñ kata ka Khasi bad Garo.
Na ka liang jong u Myntri Rangbah ka Jylla Meghalaya u Conrad K Sangma u la ai khublei kyrpang ïa u Myntri ka tnad Pule Puthi jong ka sorkar pdeng u Dharmendra Pradhan uba la pynlah ban pynrung ïa ka ktien Khasi bad Garo ha ka thup jong ka CBSE.