Ka Central Executive Committee jong ka Jaiñtia Students Movement (JSM) mynta ka sngi ka la pynlong ia ka jingsam khusnam sha ki nongjop ha ka “jingiakop thoh shithi sha u Myntri Rangbah jong ka jylla Meghalaya” halor ka phang “Ka jingktah jong ka jingkhang dewiong bad ka jinghiar ka ioh ka kot.” Ia kane ka jingialang la pynlong ha Eastside Inn Hotel bad la pynlong da ka Education Cell jong ka JSM Central Executive Committee.
Ha kane ka prokram la wan ban ïashimbynta da u President ka JSM u bah Leningstar Rymbai, u bah P. Nongtdu Principal ka Jaiñtia Eastern College, ki katto katne ki nongkitkam ka CEC, ki kmie ki kpa jong ki khynnah kiba ioh khusnam bad kiwei kiwei de ki khynnah samla kiba wan poi sha kane ka prokram.
Ha kane ka sngi ki nongjop ki long Shaniahbha Shylla, Rini Lamurong, Zephaniah R. Dkhar, Etimon Sungoh, Yolangmeki Thoo bad Pushpa Chetry.
Haba ai jingkren ha kane ka prokram, u President ka JSM u bah Leningstar Rymbai u la ong ba ka seng ka la sakhi ia kiba bun ki jingeh ba ki kmie ki kpa bad ki khynnah skul ki iakynduh naduh ba la khang tih dewiong. U la kdew ba bun ki khynnah skul ki lah ban pule tang haduh ka klas 10 bad kim lah ban bteng ia ki jingpule kiba kham shalor, bad ba ka jingpep skul ki samla ka la kiew.
U la ong ba ka seng ka ngeit ba kam dei tang ka kamram ka jong ka ban pyntip sha ka sorkar shaphang kine ki jingeh hynrei ka dei ruh ka kamram jong ki samla pule ban pynpaw ia ki jingeh jong ki. U la bynrap ba ka jingsam khusnam mynta ka sngi kam dei tang na ka bynta ki nongjop; baroh ki shithi ba la ai da ki nongiashim bynta, kynthup ia kito ki bym shym la jop, yn phah sha u Myntri Rangbah ka Jylla. U la pynpaw biang ba ki samla pule ki don ka sur bad ka bor ban pynpaw ia ki jingmut jong ki halor ka mat dewiong lyngba u khulom u jong ki.
U President Rymbai u la ai khublei ruh ïa u trai jong ka Eastside Inn u ma Monwanmi Dkhar uba la pynbiang ïa kane ka hall khlem jingsiew ei ei.
U bah P. Nongtdu, Principal ka Jaiñtia Eastern College u la ong ba ki prokram kiba kum kine ki long kiba kongsan namar ba ki pynbeit ïa ki jingeh kiba la ktah ïa ka District naduh ba khang dewïong. U la pynshai ba ka jingkhang ka la ktah ym tang ïa ka ïoh ka kot jong ka district hynrei wat ïa ka jylla bad kiwei de ki jylla ba shabar.
Bun ki skul shimet ki la khang noh namar ka jingbym don pisa. Ha shwa ka jingkhang dewiong, ki jingthep admision ki long kiba bun bha sha kiwei ki District sha bar kylla bad kynthup ha Guwahati; naduh ba la khang ha u snem 2014, ka jingpynrung kyrteng bad admission ha ki kolej ha ka District bad ka jylla ka la nang hiar namar ki kmie ki kpa kiba shaniah ha ka kamai kaba ïadei bad u dewiong kim lah shuh ban kyrshan pisa ïa ka jingpule jong ki khun. U la bynrap ba katba nang mih ki sngi, ki kyrdan pule ki la hiar: bun ki khynnah skul ki lah ban pule bad thoh hynrei ki duna ïa ka jingpule kaba kham shalor kaba donkam ban pyndonkam ïa ka jingpule jong ki ha ki bynta bapher bapher.
U bah Roitre Dkhar, General Secretary ka JSM, u la iathuh ba ka seng ka la aiti bun tylli ki memorandum sha ka sorkar naduh u snem 2015 halor ka jingktah jong ka jingkhang tih dewiong ia ka ioh ka kot bad ka pule puthi jong ka District, hynrei kam shym la ioh kano kano ka jubab. Mynta u snem, ka JSM ka la pynlong ïa ka jingïakob thoh shithi ban ailad ïa ki samla pule bad ki samla ban pynpaw beit beit ïa ki jingmut jong ki sha u Myntri Rangbah ka Jylla, da ka jingkyrmen ba un pule ïa ki shithi kiba pynpaw ïa ki jingeh jong ka District. U la ai khublei ia baroh ki nongiashim bynta bad u la ong ba ia ki lai tylli ki shithi kiba bha tam na kawei pa kawei na ki ar tylli ki Distrik la jied katkum ka jingshai bad ka jinglah ban pule.