Ka Inquiry Commission hapoh ka jingpyniaid jong u Justice R.S. Chauhan (Retd) ka la sdang ban shong ia ka jingtohkit ba lai sngi jong ka naduh ka 6 tarik mynta u bnai ha State Guest House, Shillong ha ka jingiadei bad ka jingjia jong ka jingbthei ki krem tih dewiong ha Thangsko, East Jaintia Hills District kaba la wanrah ia ka jingmynsaw bad ka jingduh noh ki mynsiem briew.
Hapoh kine ki lai sngi ka Commission ka la ioh ban lum ha ka 6/5/2026 ia ki 4 tylli ki jingthoh ba kynthup na u Principal Chief Conservator of Forest (PCCF) bad Head of Forest (HoFF), Shillong, na ka Central Mine Planning and Design Institute Ltd.(CMPDIL), Ranchi, na ka Ministry of Coal, New Delhi bad na u Director of Directorate of Mineral Resources (DMR), Shillong.
Ha ka 7/5/2026 kala lum ia ka jingthoh na ka Shallang Area Trader Association, West Khasi Hills bad na ka South West Khasi Hills Mine Owners and Exporter Association.
Mynta ka sngi (8/5/2026) pat ka Commission ka la ioh ban lum ia ka jingthoh na ka North Eastern Space Application Centre (NESAC), na ka Indian Bureau of Mines (IBM) bad na kiba ha ïing jong kito ki lanot.
Katkum ka jingpyntip na u Secretary ka Commission of Inquiry, Meghalaya, Shillong la iathuh ba Commission kan shong biang naduh ka 13 tarik haduh ka 15 tarik u bnai Naitung (July) 2026. Na ka liang ka Commission kan sa leit jurip ruh ia ka jaka ba jia kane ka jingbthei bomb dynamite, ha Thangsko.
Ha kaba iadei bad kane na ka liang ka Commission kala ai ka jingpyntip paidbah ba lada don kino kino kiba kwah ban weng ia ki jingthoh jong ki lane kiba dang kwah ban ai jingthoh ki lah ban phah sha u Secretary, Commission of Inquiry, Room 228, Main Building, Meghalaya Secretariat, Shillong lane da kaba phah email ha ka commission.inquirymeg@gmail.com.