Kawei ka jingjia sha lute kala jia ha kawei ka iing sah u Sarthe Teron ha ka shnong Dona bhoi hajan ka shnong Umkiang, kane ka jingjia ka la jia ha ka por kumba 3 baje ei ei mynstep. Ha ka jingiadei bad kane ka jingjia na ka liang ka KSU-Narpuh Circle ha ka jingialam u President Samla Phanuel Tongper, mar sien ioh jingtip ia kane kila leit wut wut ban jurip, bad la lap shi sha ia kane ka jingjia shah lute ka long iing u bah Sarthe Teron uba long u Ex-Headman jong Dona Bhoi, East Jaintia Hill District kaba don marjan bad ka Shnong Umkiang.
Ha ka jingjurip ka seng la sakhi, ba ki bynta jong ka iing kaba kah da ka tin na dien iing kala shah ot tang kat ban ngiam briew ban rung, bad ki jingdon jingem ka iing lah shah khynra bad saphret lut. Bad haba la kylli bniah na ki lanot, kila ia thuh kane ka jingjia ka lah ban dei ha ka por kumba 3 baje ne 3:30 mynstep, namar ha kata ka por ka light ruh ka lip, u slap ruh uba jur, bad ki trai iing kiba don 5 ngut hapoh iing naduh u kpa, ka kmie bad lai ngut ki khun rit, ki dang ioh thiah lyngngai.
Shuh shuh la iathuh marsien rung kita ki 5 ne 6 ngut ki suba nong Bangladesh, uwei napdeng jong ki, ula pyn-ap da ka wait ha ryngdang u kpa ka iing, hangta kiwei pat kila teh la khum da u tyllai ia baroh ki kti bad kjat jong kitei ki lanot, bad ka byrngem ban pyniap lada ki hylla briew.
Kumta kila sdang ban khynra ia ka jingdon jingem hapoh iing, kum ka Mobile Smart phone, ki jain ki nep kiba dang thymmai da kaba ki pynjot ia ka almari ba buh ia ki jing donkam, ki Bags skul jong ki khun, bad ka pisa kaba don kumba 30 hajar tyngka ei ei. Marsien dep nangta kila bthat bad byrngem ia ki trai iing ban pynkhreh kham bun ka pisa kin sa wan biang ha kawei ka sngi, kumta kila phet noh bak. Hadien ba la phet kita ki suba nong Bangladesh, mar mar u kpa ka iing ula pyrta briew ban iarap, kumta ki briew Shnong kila ia poi bad buddien ia kita ki nonglute hynrei ym iohi shuh kila phet sha ka phang ba don ka Border Fencing Bangladesh.
Ka seng KSU-Narpuh Circle kala pynrem jur ia kane ka jingjia, bad ka bynniaw ruh kum kine ki jingjia shah lute ki nongshong shnong kiba sah ha ka thain Border Bangladesh, ka shait jia man la ka por. Mynshem snem ruh ha u bnai May, 2025, kala jia kum kane shah lute bad shah byrngem kawei ka longkmie ha Shnong Umkiang, ha ki khar Bangladesh.
Namarkata ka seng ka pynrem jur bad kam kwah shuh ban iohi kum kine ki jingjia shah lute, shah pyniap ha ki ‘riew suba nongbangladesh bad ka seng ka dawa jur ruh ia ki bor Border Security Force (BSF) kaba dei ban peit ia ki khappud Indo-Bangla (International Border) ban peit ngor bad ai ka jingiada kaba pura ia ki nongshong Shnong Border, khnang ban nym bteng shuh ki jingjia ba sngewsih kum kine.