–Lum Dorbar ban dawa na u Dolloi ban pan map–
Ka Dorbar Shnong Mynkrem Shangpung ha kane ka sngi Saitjaiñ 1 tarik u Nailar, 2026 kala lum ïaka Dorbar bah naduh ki longkmie longkpa, ki tymmen, ki samla, ha Community Hall hajan madan phutbol ka Shnong halor ka jingleh donbor u Daloi ka Elaka Shangpung u Chanky Langbang ïa ka khlaw Shnong jong kane ka Shnong da ka jingthmu jong u ban die judor ïa kane ka khlaw ba la ri sumar da ka Shnong Mynkrem naduh barim bajah haduh mynta ha kaba u Daloi u mut ban die sha uwei u briew ba juh thied dieng na bar ka Shnong.
Ha kane ka jingïalang la pynïaid da u Ledious Sungoh, uba dei ruh u Chairman ka Dorbar Shnong bad ha kajuh ka por u juh long teng 9 snem kum u Waheh Shnong ha ka snem 2001 shaneng ha kane ka shnong.
Ha kaba ïadei bad kane u Waheh Shnong jong kane ka shnong u Risnainlang Langstang u ong ha ka 28/07/2026 por mynstep u ïoh ïaka phone call na u wei na ki nongkhaïi dieng uba nabar Shnong, kiba thmu ban thied ïa kane ka khlaw u kylli kumno kato ka khlaw u Daloi u mut die noh ïa nga, na liang jong u Waheh Shnong ula khang ïa uta u briew namar kane ka khlaw kadei jong ka Shnong, sa kawei ruh u ong kumno kumta uta u Daloi u wan tuklar ïa khlaw Shnong jong ka Shnong khlem ka jingtip ka Shnong.
Hadien kata, ha katei hi ka sngi ha ka por 10:44 am u Waheh Shnong jong kane ka Shnong ula ïoh pat sa ka phone call na u Daloi kane ka Elaka, u ong da kaba maham bad kren shitkhlieh ïa u Waheh Shnong da ka ong “Balei me khang ïa kito ba mut ban ot ïa ki to ki dieng, lada ki briew jong nga kim ïoh ban ot laitluid ïa kito ki dieng ngan sa ïa peit ïa me” ki kyntien maham na u Daloi.
Kane ka khlaw ym tang kane ka sien ba nyngkong u thmu ban leh Donbor kumne ong u Waheh Shnong, ula juh wan teng ruh shisien bad ki kynhun jong u ha ka 01/04/25, da kaba ki pynpait ïa ki maw sieh pud ki barim bajah naduh hyndai na ka bynta ka jong ka Khlo Raij shaphang South bad Khlo Dorbar Shnong shaphang North. Kine ki mawpud ba shah leh dusmon na u Daloi naduh pdeng Luhung- Pharit Heh.
U waheh Shnong mar sien ïoh jingtip shapang kata ka jingleh donbor u Daloi ïa ki mawpud ka khlaw Shnong jong u, ka Dorbar Shnong da kawei ka jingthmu ba bha ka phah da ka shithi sha u Daloi ha ka 12/04/2025 ban leh ei ei ïa kata hynrei haduh mynta ba pynmih ïa kane ka khubor, u kheiñ kam kai ïa kata um jubab ei ei.
U Waheh Shnong u ong kane ka khlaw ym pat juh shah ka Shnong ban die tang shisien ruh lada long nongïalam da uno uno ruh ha ki por ba shadien namar kum shi bynta ban pynneh pynsah ïa ka bei mariang naduh ki khlaw ki btap haduh ki mrad mariang. Ka Shnong ka ri sumar bha ïa kine ki dieng na ka jingshah pom pathar bad la mana ruh na ka por sha ka por ba ym shah ban thang ding kulmar. Ka khlaw ka btap ruh ka long kaba heh ba san bha ki dieng. Kata ka daw bun kiba shim kabu ban ïoh die na ka bynta ka kamai spah jong ki.
U Waheh u ong, ha kaba ïadei bad ka jingthmu jong u Daloi ban leh Donbor ïa kane ka khlaw shnong jong ka Shnong, na ka liang jong u waheh Shnong ryngkat ki paidbah kim kwah ïa ka jingkulmar bad ki buh ha khmat lada dei ka hok jong u Daloi shimet lane jong ka Elaka mih Shakhmat wanrah da ki kot ki sla lada don ki kot ki sla ba ai da ka Dorbar Shnong sha u Daloi lane sha ka Elaka namar ka Dorbar Shnong hi kam ailad lada shu kam khlem nongrim.
U ong ruh kat kum ka History kane ka Shnong kadei ka Shnong kaba la rim ym dei ka Shnong ba dang shu seng thymmai. Kane ka Shnong kadei ka Shnong ka ba la lai ne saw pateng ki rta briew ha shwa ban ïoh wat tang ïa ka District Council 1952. Ngi tip tang hadien ba ïoh ïa ka District Council lah ban long trai ïa ka khyndew ka shyiap. Ka Shnong ka don ka nongrim shwa ban ïoh ïa ka District Council bad ka jingshongsuk shongsaiñ hapdeng ki nongshong shnong bad ki para ba marjar ruh ki don la ki jong ki pud ki sam.
Halor ka jingshah maham u Waheh Shnong na u Daloi, u pynpaw ka jingbymsngaiñ ka leit ka wan jong u, kum u Daloi ba pynkamti ka bor ka mat treikam rynkat ki aiñ na ka District Council u nud ban maham kum kine ki kyntien runar ka jong u kat ïa u Waheh Shnong ba kup ka bor na ka District Council.
U Waheh Shnong u ong ruh, wat ïa nga u waheh Shnong dang nud u Daloi ban maham kum kine ki kyntien, un eh aiu ïa u ban maham wat ïa ki rit ki ria ki khun ki hajar jong u. U Waheh Shnong u ong nga burom ïa ki aiñ ba pynkhamti ïa nga da ka District Council, Hato u Daloi u ïoh bor nangno ban maham runar ïa ki khun ki hajar jong u?
U Waheh Shnong u ong ruh, u Daloi u leh kam kai ïa ka shynshar khadar, kino kino ki shithi ba la phah da Dorbar Shnong nalor ka shithi ba ai ha katei ka 12/04/2026 dang don kiwei kiwei ba ai ha katei hi ka 12/04/2025 bad ha ka 30/06/2026 kamut baroh 3 tylli ka Shithi um sym leh ei ei.
U Nisumarlang Phyllei Assistant Waheh Shnong, u ong ngim ailad ïa kane ka jingleh donbor u Daloi ïa ka khlaw Shnong jong ngi namar ngi la tip shai kdaw ba naduh barim bajah kadei ka khlaw Shnong jong ngi kaba ri sumar ïa ki dieng ki seij da ka Dorbar Shnong ban heh ban San bad ngi ai dieng shna ïing shna sem bad dieng thang tang kat kum ka jingdonkam ki paidbah. U ong ruh, dang ki Daloi ba shadien um juh pynthud ïa kane ka khlaw Shnong jong ngi, ngi shongsuk shongsaiñ hi hynrei yn da poi da u ne u Chanky Langbang ba mynta u leh Donbor kumne tip u ïoh bor na ei ban thaw ka jingkulmar kumne ha jaka ba un thuh lad ïa ka suk saiñ hapoh ka hima jong u.
U ong ruh ïa kata ka jingmaham jong u Daloi ia u Waheh Shnong, kum ki paidbah ka shnong ki pynpaw ka jingpynrem jur ïa u Daloi bad ngi la dawa ruhïia u Daloi ban wan pan map mardor ia u Waheh Shnong ha khmat jong ngi ki paidbah tang hapoh 3 sngi, lum kumta ki paidbah kin maham ban ujor sha ki bor ba halor pyrshah ïa ka jingkren runar bad jong leh donbor jong u Daloi.
