[Ki ïing ba la shah pynjulor ha shnong Nongkhlaw kiba hap hapoh ka Mairang C&RD Block, EWKH Dist.]
Ka jinglynshop jong ki bor mariang lyngba ka lyer ba jur, u phria bad u lapbah ia kiba bun ki bynta jong ka Jylla Meghalaya hynning ka sngi (5/5/2024), kala wanrah ka jingshahktah jong ki nongshong shnong na ka jingkyllem bad shah kyndang ki ïing ki sem, ki skul bad ki ïingmane kumjuh bad ki jingthung jingtep ruh.
Katkum ka tyllong khubor sorkar ba la iohlum lyngba ka ophis Executive Director, State Disaster Management Authority, Meghalaya, Shillong, la iathuh ba kila don haduh 949 ngut ki nongshong shnong kila shahktah ha kane ka jingjia. Ki don haduh 483 tylli ki ïing shong briew kila julor, 2 tylli ki skul bad kawei ka ïingmane, ha ki 29 tylli ki shnong kiba la shahktah ha kane ka jingjia ha ki bynta bapher bapher jong ka Jylla.
Kine 2 tylli ki skul kidei kiba hap hapoh ka Eastern West Khasi Hills District jong ka Mairang C&RD Block. Ka ïingmane pat ka dei kaba don ha East Jaiñtia Hills District kaba hap hapoh ka Wapung C&RD Block.
Na ka liang ka sorkar lyngba ki bor pyniaid District kala ai ka jingiada ia baroh ki nongshong shnong kiba la shahktah ha kane ka jinglynshop mariang, da kaba pynioh jaka sah ia ki ha ki jaka ba long shngaiñ.
[Ki ïing kiba la pei na ka jinglynshop u phria ha Rongchekgre bad Nengkong, ha South Garo Hills Dist.]