Haduh kumba 61 ngut ki khynnah Cadet (kynthei bad shynrang) jong ka NER NCC napoh ka jylla, lyngba Gp HQ Shillong kila leit hiar sha ka Krem Liat Prah bad pynlong ka jingwad bniah shaphang ki krem bad ki synrang jong ki lum ki wah kiba itynnad ha katei ka thaiñ jong ka shnong Shnongrim, Nongkhlieh, East Jaiñtia Hills District.
Ïa kane ka Camping la tip kum ka “Spelunking & Rappelling Adventure Camp” kaba la sdang naduh ka 17 tarik haduh ka 23 tarik u Lber, 2026 hapoh ka jingpynïaid ka 42 Meghalaya Bn NCC.
Kitei ki khynnah Cadet kila ïoh lad ban leit hiar shapoh ka Krem Liat Prah kawei na ki krem kaba itynnad bad kaba heh tam hapoh ka jylla, la wad bniah ïa ka jingjylliew jong ka bad la lap ïa ka jinglong ba phylla bad ka jingitynnad jong katei ka krem.
La ïalam ïa ki khynnah NCC halor ka rukom hiar bad kiew ïa ki lum da ka jingdonlang ka kynhun Meghalaya Mountaineering Association, ha kaba kila ïoh lad ban snoh ïaki lum ki wah kiba don haki synrang maw ba jrong.
Shuh shuh la ai jinghikai ïa ki halor ka rukom teh ïaki tyllai, ki rukom pyndonkam ïa ki tiar ki tar kiba donkam ban pynsnoh ïa ki haka por ba hiar bad kiew ïa ki lum bad ki jingkit kiba bun.
La pynsngew da ki nongïashim bynta kane ka Camp kala ïarap ïaki kum ki khynnah NCC ka jylla, ba kin tip halor ka rukom wad bniah bad leit jngoh ïa ka mariang kaba la pynsngewtynnad eh haka jingïaid lynti jong ki.
