Ka Jaintia Students’ Movement (JSM) ka pdiang sngewbha ïa ka jingdawa jong u Hon’ble Chief Minister ka Meghalaya sha ka Sorkar India ban ai ïa ka delegation of powers hapoh ka Section 26 jong ka Mines and Minerals (Development and Regulation) Act, 1957, na ka bynta ban pynïaid ïa ka kam tih dewïong ha ki Scheduled Areas jong ka Meghalaya katkum ka aiñ.
Ka JSM ka ngeit skhem ba kane ka dei ka lad kaba biang tam ha kane ka por ban wanrah biang ïa ka jingtih dewïong kaba long katkum ka aiñ bad ban ïada ïa ka jingïoh kam jingïoh jam jong hajar ngut ki longïing ha Ri Jaiñtia.
Hynrei, ka JSM ka pynpaw da kaba shai ba ka jingai bor hapoh ka Section 26 kam dei satia ban pynduna ne ktah ïa ki hok ba la ai da ka Riti Synshar ka Ri India ïa ki Autonomous District Council hapoh ka Sixth Schedule.
Ynda ka Sorkar Pdeng ka la ai ïa kine ki bor, ka JSM ka kyntu ïa ka Sorkar Meghalaya ba kan thaw ïa ka aiñ kaba la tyrwa da ka jingïasyllok kaba pura bad ka Jaintia Hills Autonomous District Council (JHADC). Hadien kata, dei ban wanrah ïa katei ka aiñ ha ka Ïingdorbar Thaw Aiñ ka Meghalaya ban pynmynjur bad ban ïoh ruh ïa ka jingmynjur jong u Lat ka Jylla (Governor), khnang ba kan long ka aiñ kaba don ka bor treikam pura.
Kane ka jingïatreilang hapdeng ka Sorkar Meghalaya bad ka JHADC kan pynthikna ba ka aiñ kan pynïahap lang ïa ka jingdonkam ban kyntiew ïa ka roi ka par jong ka Jylla bad ruh ban ïada ïa ki hok tynrai, ki riti dustur bad ka hok halor ka khyndew jong ki trai ri trai muluk kiba la ïoh jingïada hapoh ka Sixth Schedule.
Ka Nongrim ba Shai jong ka JSM:
- Ka ai ka jingkyrshan pura ïa ka jingdawa ban ïoh ïa ka delegation hapoh ka Section 26, kumba la dawa da u Chief Minister, kum ka lad jingïarap kaba kyrkieh.
- Ka pyrshah jur ïa kano kano ka jingthmu ban pynlait ne kynthup lait ïa ka JHADC. Ka aiñ na ka bynta ki Scheduled Areas dei ban thaw lang da ka Sorkar Meghalaya bad ka JHADC.
- Ka aiñ kaba la thaw dei ban wanrah ha ka Ïingdorbar Thaw Aiñ ka Meghalaya ban pynmynjur bad ban ïoh ïa ka jingmynjur jong u Governor, khnang ba kan long ka aiñ kaba treikam bad kaba pynïeng nongrim ha ki Scheduled Areas.
- Ka aiñ thymmai ka dei ban pynthikna ïa ka jingtih dewïong kaba neh slem, ka jingïada ïa ka mariang, bad ka jingïada ïa ki hok jong ki trai khyndew bad ki nongtrei.
Ka JSM ka kyntu ïa ka Sorkar Meghalaya ba kan burom ïa ka JHADC kum ka bynta kaba ïaryngkat ha kane ka kam. Tang da ka jingïatreilang yn lah ban don ka aiñ kaba pdiang bad kaba mynjur da ki paidbah jong ka Ri Jaiñtia. Ka kyrwoh lyngba u President Jaintia Students’ Movement (JSM) Central Body Shri. Leningstar Rymbai.