Ka Jaiñtia Student’ Movement (JSM) CEC Education Cell ka la pynlong ia ka jingiakop thoh shithi sha u mMntri Rangbah ka sorkar jylla mynta ka sngi ka 20 tarik u bnai jylliew 2026 halor ka phang “Ka jingktah ka jingkhang dewiong bad ka jinghiar ka ioh ka kot”.
Ki khynnah skul kiba lah ban iashim bynta ha kane ka jingiakop ki long naduh ka klas 10, 11, 12, bad ka kyrdan pule undergraduate (UG). Ki nongiashim bynta ki lah ban thoh ha ka ktien Khasi ne Phareng.
Ia kane ka jingiakop la pynlong ha Jaintia Eastern College kaba don ha Khliehriat, East Jaintia Hills District. Ki nonghikai kolej ki la buddien ia ki samla pule ban pynthikna ba ka jingiakop kan long kaba laitluid bad kaba hok.
Haba kren ha ki lad pathai khubor hadien ba la wai ka jingiakop, u President ka JSM u bah Leningstar Rymbai u la ong ba ka jingthmu ka long ban ai lad ia ki samla pule ba kin iasam kumno ka jingkhang dewiong ka la ktah ia ka pule puthi bad ka kamai kajih jong ki. U la batai ba bun ki samla pule ki sangeh noh hadien ba ki la dep SSLC, HSLC, ne wat ba ki la dep pule namar ba kim ïoh ïa ka lad ban bteng ïa ka jingpule jong ki.
Ha ri lum Jaiñtia khamtam ha East Jaiñtia Hills District, ka jingtih dewïong ka dei ka lad kamai kaba hakhmat eh. Naduh ba la khang tih dewiong ha u snem 2014 haduh mynta la palat 12 snem, ki kmie ki kpa bad ki longïing ki la ïakynduh shibun ki jingeh. Ki seng trei mon sngewbha bad ki sengbhalang ki la iakhih ban sdang biang ia ka jingtih dewiong.
Ka JSM ka la pynlong ia kane ka mat kum ka mat kaba kongsan. Ka seng ka kwah ba ki samla pule kin iathuh ia ka jingshem jong ki halor ka jingkhang tih dewiong bad ka sorkar bad kata ka dei ka daw bah kaba la pynlong ia katei ka jingiakop. Ka jingiakop mynta ka sngi ha Jaintia Eastern College ka dei kaba nyngkong; ka sien kaba ar kan long ha Jowai ha ka 27 tarik u mynta u bnai bad ia ka por bad ka tarik yn sa pynbna kham hadien.
U Rymbai u la ong ba ki samla pule bad ki samla ki don ka hok ban pynlong ia ka sorkar ban iohsngew ia ka jingktah jong ka jingkhang tih dewiong. Palat 20 ngut ki samla pule kiba la iashim bynta mynta ka sngi. Ki khusnam ki long: ka khusnam kaba nyngkong ₹5,000, ka khusnam kaba ar ₹3,000, bad ka khusnam kaba lai ₹2,000. Na ka liang ka seng kan sa phah baroh ki shithi sha u Myntri Rangbah ka Jylla.
U la bynrap ka jingduna ha ka jingwan iakop thoh shithi mynta ka sngi ka lah ban dei namar ka jingduna ki jingtip bad ki jingpynbna. Yn pynbna ia ka result hadien ka 27 tarik. Ia ki shithi yn phan pynbeit da ki riew shemphang kiba nabar; ka seng kan nym leh ia ka jingpynbeit ia ki shithi mano ba jop. Ki la thung ia ki riew shemphang kiba la nang bha ban thoh shithi ban pynbeit ia ki shithi jong ki khynnah pule kiba iawan ban iashim bynta mynta ka sngi.
