Ki longkmie hapoh ka kynhun jong ka Women Organization of Ri Bhoi District (WORD) ki la pyntip ba naduh ka 16 tarik Ïaiong 2026 ki la rai ban shong shah thngan lang bad u Chairman ka Green Tech Foundation u Bah H. Bansiewdor Nonglang.
Haba kren sha ki lad pathai khubor ka President jong ka Women organization of Ri Bhoi District ka Kong Mira June Marsing ka la pyntip ba ki kynhun longkmie jong ka Women’s Organization of Ri bhoi District kin pynlong ia ka jingshong shah thngan ha ryngkat bad u Chairman ka Green Tech Foundation u bah H Bansiewdor Nonglang.
Nalor kata ka la ong ba ka Women’s Organization of Ri bhoi District ka ai jingkyrshan pura ia ka Green Tech Foundation halor ka jingiakhih jong ki ban dawa weng noh ia ka project ban wanrah ha Lumpongdeng.
Ka jingshim ia ka rai ban shong shah thngan ka dei hadien ba ka sorkar ka lah khot iakren ia ka GTF bad kam shym seisoh hadien ba ka Green Tech Foundation ka la bteng biang ia ka jingshong shah thngan, kumta ki Longkmie jong ka Women organization of Ri bhoi District ki la rai ban pynlong da ka jingshong shah thngan naduh ka sngi ka 16 tarik ïaiong 2026 ha madan Malki.
Khatduh ka la bynrap ba lada jia ei ei ia u Chairman ka Green Tech Foundation ka Sorkar ka dei ban shim ia ka jingkitkhlieh.