Ki lai tylli ki skul kiba long ki lahduh jong ka District Level Inter-School Subroto Mukherjee Cup 2026 na East Jaintia kin ioh ban leit mih khmat ia ka District sha ka State Level ka ban sa long shen ha nongbah Shillong mynta u bnai.
Kine ki skul ki kynthup ia ka Step By Step Secondary School kaba long ka lahduh ha ka Under 15 Boys, ka Wapung Higher Secondary School ka long ka lahduh ha ka Under-17 Boys katba ka Lotus Secondary School ka long ka lahduh ha ka Under-17 Girls.
Ha ka jingialehkai Final jong ka Under-15 Boys, ka Step By Step SS ka la pynliem ia ka Musniang SS da 1-0 kol, ha ka jingiakhun Uner-17 Boys pat ka Wapung HSS ka la pynliem ia ka Sein Raij Tuber HSS da 4-3 kol lyngba ka tie breaker. Katba ha ka jingiakhun Under-17 Girls ka Lotus SS kala pynliem ia ka Khliehriat HSS da 2-0 kol.
Kum ban shu pynkynmaw ia ka jingialehkai District District Level Inter School Subroto Mukherjee Cup 2026 ha East Jaintia Hills la pyniaid da ka ophis District Sport Officer (DSO), kaba la sdang naduh ka 16 tarik u Jylliew 2026 bad kala poi sha kaba kut ha ka 3 tarik mynta u bnai, ha madan ialehkai jong ka Deinchynrum, East Jaintia Hills District.