Ia ka jingai jinghikai kaba 3 (lai) sngi lynter na ka bynta ki Enumerators bad ki Supervisor ha kaba iadei bad ka jingkhein khana samari (Census) jong ka Ri India 2027 la pynkut mynta ka sngi ha Amlarem C&RD Block, West Jaintia Hills. Ia kane ka prokram la pynlong kum shi bynta jong ki kam pynkhreh na ka bynta ki kam Census ki ban sa wan.
Ha kane ka prokram la wan ban ïashimbynta da u ma Lahkmen Rymbui, MLA ka Amlarem Constituency bad u Myntri ba dei peit ïa ka tnad Pule Puthi, Information & Public Relations, Law, bad ka tnad Revenue & Disaster Management, kum u Kongsan. Ha kane ka sngi la ïa donlang ruh u Dr. Damuthimi Lyngdoh, Block Development Officer jong ka Amlarem C&RD Block, u ma Medling M. Swer, MDC ka War East, u ma Kampher Pohlong, Secretary ka Synjuk ki Rangbah Shnong War Jaiñtia, ki ophisar jong ki tnad treikam bapher bapher, ki nongialam shnong bad ki Supervisor bad ki Enumerator.
Baroh ki don 120 ngut ki nongïashim bynta ha kane ka prokram ai jinghikai, ba kynthup ïa 102 ngut ki Enumerators bad 18 ngut ki Supervisor.
U ma Lahkmen Rymbui haba ai jingkren ha kane ka jingïalang u la pynpaw ba watla ha kaba nyngkong la thmu ban leh ïa ka Khanasamari ha u snem 2021 hynrei la hap ban pynsangeh noh namar ka khlam Covid-19. U la ong ba ka Khanasamari jong ka ri India 2027 ka long kaba kongsan haduh katta katta na ka bynta ka ri bad pyntip ba kane ka Khanasamari kaba mynta kan pyndonkam bha ia ka digital technology bad ki rukom peit bniah online na ka bynta ban lum jingtip bad pynshisha.
U Myntri u la pyntip ba ka jingtreikam jong ka Census ka kynthup ïa ki bynta bapher bapher, kynthup ïa ka jingkheiñ ïalade, ka jingkheiñ ia ka jingdon ki ïing bad bud sa ka jingkheiñ ïa ki nongshong shnong ha u snem 2027. U la ban jur ba ka jingkheiñ jingdiah kaba thikna ka long kaba donkam bha namar ba bunsien ki skhim sorkar, ki projek pynroi bad ki prokram ai jingïarap ki long katkum ka jingkheiñ jingdiah jong ka Census.
U la kdew shuh shuh ba katto katne ki shnong kiba la seng hadien ka Census 2011 kim shym la lah ban ïoh ïa kiba bun ki jingmyntoi na ka sorkar namar ka jingbym shym la pynrung ha ki kot ki sla jong ka Census. U la pyntip ba ïa ka thup Census la pynsangeh noh naduh ka 31 tarik u Naiwieng 2025 bad yn kheiñ lut ïa baroh ki shnong bad ki longïing kiba kynthup hapoh ka por ba la buh.
Haba pynpaw ia ka jingdonkam jong ka jingiashim bynta, u ma Rymbui u la pynpaw ba ki jingtip kiba iadei bad ka jingdon jong ki longiing, ka jingbun briew, ki skul, ki surok, ki umbam umdih bad ki kam pynroi bapher bapher baroh la pyniasoh bad ki jingthoh jong ka Census. U la ban jur ruh ïa ka jingdonkam ban kynthup lang ïa baroh ki nongshong shnong kiba dei hok, kynthup ïa kito kiba sah shabar jong ka shnong ne ka jylla, khnang ba ym don uwei ruh u nongshong shnong ba shisha uba shah iehnoh beiñ.
U Dr. Damuthimi Lyngdoh, BDO ka Amlarem C&RD Block, ha ka jingkren jong u, u la ong ba ka jingpyntreikam ia ka Census ka long kaba kongsan bha na ka bynta ki kam pynroi bad u la khot ia ka jingiatreilang naduh ki nongialam shnong bad ki nongshong shnong ban pynthikna ba kane ka jinglum jingkheiñ kan long kaba iaid beit iaid ryntih. U la pyntip ba ki Enumerators bad ki Supervisor kin shimkhia ia ka kam ha baroh ki shnong kiba hap hapoh ka Block.
Ka bynta ba nyngkong jong Self Enumeration kan long naduh ka 1 tarik u Jymmang 2026 haduh ka 15 tarik u Jymmang 2026, katba ka jingpynshisha ha ki jaka bad ka jingpynrung kyrteng ia ki ïing kan sdang hadien kata kum shi bynta jong ka bynta ba nyngkong jong ka jingkheiñ briew (Census) 2027.
