Ka Jaintia National Council (JNC) Central Executive Committee hapoh ka jingialam jong u General Secretary bah Wanshwa Suting kala leit ban pan jingshai ryngkat bad ka jingthoh sha i Secretary Executive Committee ka JHADC kong B. Bamon ha kaba iadei bad ka kam kur kam jait hapoh ka jingpeit ka Council.
Kane kala wan bud hadien ba ka JHADC ka la mynjur ïa ka thup ba ar jong ka ban ithuh ïa ki jait kur kum ki trai ri trai muluk ha ka ri Jaiñtia (Ri Jaiñtia), ka JHADC hadien ba ka la pynrung ïa ki jait kur jong kiwei pat ki jaitbynriew bapher bapher kum ki Biate, ki Karbi, ki Hmar, bad kiwei kiwei ki jaitbynriew ki bym dei na tynrai jong ki nonh Jaiñtia tang naka daw ba ki la shong slem, bad kane ka jingleh jong ka JHADC ka lah ban don ka lad ban wanrah ïa ki jingeh bad jingkulmar kaba khraw hadien habud ha ki pateng ban wan hapoh ka Ri Jaiñtia.
Haba iakynduh bad iakren bad ka kong B. Bamon, ka la kubur ia kane kum ka mat kaba sngewkhia eh shibun bad ka seng ka kyrpad tyngeh ia ka ophis jong ka JHADC ban pynshai ia kine harum:
Kiei ki seinjam bad ki jingpynshisha kaba ka JHADC ka la shimkhia ban pynbna ia kine ki jaitbynriew — kiba la shah pynrung ha ka thup jong ki kur ka Ri Jaiñtia kum ki nongshong shnong trai ri kiba hap hapoh ka jingpeit jong ka JHADC, khamtam kito ki jaitbynriew kiba la buh kyrteng hapoh ka “Annexure II (B) OTHER CLANS RECOGNISED AS INDIGENOUS TRIBE BY PROLONGED SETTLEMENT
Kane ka rukom leh Jong ka JHADC ban ithuh ia kine ki jait kur jong kiwei pat ki jaitbynriew riewlum hapoh ka thup jong ki kur ka Ri Jaiñtia, kaba long trai da ki Pnar, Khasi kan ktah ne em ia ka hok longtria jong ki trai ri ha baroh arliang??
Kiei ki lad iada ba ka JHADC ka pynkhreh na ka bynta ban iada ia ka hok long trai ki trai ri trai muluk kiba dei u Pnar, Khasi, khamtam ha kaba iadei bad ka bhah thungkam thungjam.
Ka JNC kam lah ban pdiang ba ïa ki jaitbynriew Biate, Karbi, bad kiwei kiwei ki jaitbynriew (Riewlum) ban kheiñ ia ki kum ki jaitbynriew tynrai (Tre Chnong) ha ka Ri Jaiñtia, namar ka histori jong ngi (Jaiñtia) ka pyni shai ba ngi ïapher bak-la bak na kine ki jaitbynriew, naduh ka riti dustur, ka Ktien thylliej bad ka riam ka beit.
Namarkata, ka JNC ka dawa thikna ia ka jingpynshai na ka JHADC: “Kiei de kita ki trai ri trai muluk (Khon ka Ri Jaiñtia) kiba long shisha kita ki trai kiba bat ia ka hok jong ka khyndew ka shyiap (Tre Ri) hapoh u pud u sam jong ka JHADC?”
“Ngim don kano kano ka daw, ka jingwit ne jingthut bad kiwei pat ki JAIDBYNRIEW riewlum kiba don bad sah slem hapoh ka Ri jong ngi, hynrei ngi donkam ruh ban pynneh pynsah ia ka hok long trai ka jong ngi, ka hok jong ngi naka bynta ka lawei ka jaitbynriew jong ngi”, ong ka JNC.
Ka JNC ka kyntu ia ka JHADC ban jubab ia kane ka shithi “hapoh 14 sngi” naduh ba la ioh pdiang. Lada ka JHADC kam lah ban jubab hapoh kane ka por, ka JNC kan hap ban shim da kiwei pat ki sienjam bad ki kam katkum ba ka sngewdei, pynkut u bah Wanshwa Suting, General Secretary JNC CEC.