Ka NPYF 1–Nartiang Constituency ka pynpaw ïa ka jingbym mynjur ne ka jingbym iahap satia halor ka jingkren jong u President ka VPP ha ka 5 tarik u Jymmang 2026 ha Jowai, ha kaba u la kynnoh ba ym don satia ka jingroi ha ka thaiñ Jaintia Hills.
“Ngi kwah ban pynshai ba kane ka jingkren kam ïahap bad ka jingshisha kaba paw ha madan, khamtam eh ha ka 1–Nartiang Constituency. Ha kine ki snem ba la leit, la sakhi shai ïa kiba bun ki kam pynroi kiba la urlong, naduh ki surok bad ki jingtei bapher bapher, ka pule puthi, haduh ki lad jingïasoh kiba la pynsuk ïa ka jingïaid lynti bad ka jingïadei hapdeng ki shnong. Kine ki sienjam ki la wanrah ïa ka jingkylla kaba bha ha ka imlang sahlang bad ka jingim jong ki paidbah. Kaba kham kongsan, ngi sngewkmen ban ïohi ïa ka jingpynleit jingmut kaba jur sha ki samla. Ki skhim pyntbit, ki lad jingïoh kam, bad ka jingkyrshan ïa ki jingsengkam lajong, ki la plie lad ïa ki samla ban kyntiew ïalade bad ban long bynta ba kongsan ha ka jingtei ïa ka lawei jong ka constituency. Ha kajuh ka por, ha ka jingïaid lynti jong kane ka jingroi, ka jingïalam jong u MLA ka 1–Nartiang Constituency uba long ruh u Symbud Myntri Rangbah ka Jylla Meghalaya, u Bah Sniawbhalang Dhar, ka la long kaba don bynta shibun. Kumta, ngi pynrem jur ïa ki jingkynnoh kiba la mih pyrshah ïa u, bad ngi kdew shai ba kitei ki jingkynnoh ki long kiba thok bad kiba khlem nongrim. Ngi sngew ruh ba kum kine ki jingïakynthoh kim dei tang ban ktah ïa u shimet, hynrei ki i kumba kdew kti ruh pyrshah ïa ki samla bad ki paidbah ka 1–Nartiang Constituency hi baroh kawei” ong ka NPYF.
Shuh shuh ka NPYF 1–Nartiang Constituency ka pynpaw ba ka ïeng skhem ha ka nongrim ba, wat la dang donkam ban pynbha shuh shuh ha ki bynta katto katne, hynrei ym dei ban kyntait lane pynjah burom ïa ki jingroi kiba la dep ban urlong. Ka seng kan kyrshan ïa kino kino ki sienjam kiba wanrah ïa ka jingroi, ka jingïatylli bad ka bha ka miat na ka bynta baroh.
Ka NPYF-1 Nartiang Constituency haba haba shimkhia ïa ka jingkren jong u President ka VPP ba u la ong ba u Bah Sniawbhalang Dhar u dei ban leit “tuition” na u ban sngewthuh ïa ka saiñ pyrthei, ka NPYF 1–Nartiang Constituency ka kwah ban pynpaw da kaba shai ba lehse dei ma u hi uba donkam ban leit tuition ha u Bah Sniawbhalang Dhar, khnang ban sngewthuh kumno ban wanrah ïa ka jingroi kaba shisha bad ruh kumno ban jop ha ka jingïakhun election da ka jingshakri kaba hok ïa ki paidbah.
“Ka NPYF-1 Nartiang Constituency ka kyntu ïa baroh kiba don bynta ban ïashim bynta ha ka jingïakren kaba tei, kaba pynshong nongrim ha ka jingshisha bad ka jingkitkhlieh lang, na ka bynta ka jingroi kaba ïaineh bad kaba ïai bteng ha Jaintia Hills” la pynkut ka NPYF-1 Nartiang Constituency.