Khang ki bor District EJH ban tur sha DC Ophis Khliehriat, pynshai halor ka jingphah ia u Dr. Langstang sha ka jaka shah thngan u President ka JCOMSWA

Ka khubor kaba la pyllait mynta ka sngi na ka ophis jong u Deputy Commissioner ka East Jaintia Hills District, kala pyntip ba kan don ka jingkhang iaid paidbah (Rally) lashai 16/06/2026 ban tur sha DC Ophis, Khliehriat bad ha kajuh ka por la pynshai paidbah ruh ha ka jingiadei bad ka jingphah ia u Dr. F.E. Langstang sha ka jaka shong shah thngan jong u Marshall SB Biam.

Kane harum ka long ka jingpynshai kumba ka long na ka ophis u Deputy Commissioner, East Jaintia Hills District:-

Ka la don ka jingthmu ba na ka liang ka Jaintia Coal Owners, Miners, Suppliers & Workers Association (JCOMSWA) kin pynlong ia ka jingiaid paidbah (Rally) na Ladrymbai Dongwah haduh ha ka Ophis jong u Deputy Commissioner, East Jaintia Hills District, Khliehriat ha ka 16^th June, 2026. Kumta ka District Administration ka kyrpad ia ki nongialam jong ka JCOMSWA ban nym tur paidbah sha ophis jong u DC namar la khang ban ialum paidbah ha katei ka ophis lyngba ka hukum katkum ka Kyndon 163 jong ka Bharatiya Nagarik Suraksha Sanhita, (BNSS), 2023 Dated 20^th May, 2026. Ka Sorkar Jylla ka la shimkhia ia ka lad ban plie ia ka jingtih dewiong bad ka Sorkar Pdeng bad kane ka kam ka dang iai bteng haduh mynta ha ryngkat ka jingiatrei lang jong ki trai par dewiong, ki nongshalan nongkhaii bad kiwei kiwei.

Shuh shuh ka ophis jong u Deputy Commissioner ka kwah ban pynshai halor kato ka khubor ba la saphriang ha ki lad pathai khubor kaba ong “Phah ka Ophis DMHO-EJHD da u Doctor Mrad ban exsamin ia u Bah Marshall ba shah thngan ha Lad Rymbai”. Halor kane ka ophis ka don ban ong ba ha ka 12^th June, 2026, u Dr. F. E. Langstang, A.H. & Veterinary Officer, Khliehriat u lah leit ha katei ka jaka shah thngan kum u “Majistor (Executive Magistrate)” katkum ka order ba la pynmih da u District Magistrate lyngba ka Order No. EJHD/CON.3/L.O/VOL.I/2025/142 Dated 9^th June, 2026”. Shuh Shuh na ka liang u DMHO, Khliehriat u la pynmih ia ka roster duty jong ki Doctor (Medical & Health Officers) ban leit peit ia ka koit ka khiah u Bah Marshall Biam lyngba ka Shithi No. DM&HO/EJHD/MISC-05/2025-26/3175 Dated Khliehriat the 5/6/2026. Te kumta ka jingkynnoh ba phah da u Doctor Mrad ka long kaba bakla bad lamler.

Shuh shuh na ka liang jong u General Secretary ka JCOMSWA u la kylli na u Additional Deputy Commissioner, Khliehriat ia katei ka jingwan u Dr. F.E. Langstang bad la pynshai ia u ba la phah ia u Dr, F.E. Langstang kum u Majistor (Executive Magistrate) bad u Medical & Health Officer ruh un sa wan tang dep ka training jong u. Ka ophis jong u Deputy Commissioner, Khliehriat kaban biang ban pynshai ba u Dr. F.E. Langstang, A.H. & Veterinary Officer, Khliehriat u leit duty kum u Majistor (Executive Magistrate) bad udei uwei na ki officer hapoh District ba lah pynkhamti ia ka bor Executive Magistrate da ka Law Department.