Mynta ka sngi ka 15 tarik u August 2026 la rakhe ia ka sngi laitluid jong ka Ri India ha madan Holy Family Parish, Khliehriat, East Jaintia Hills District. Ki don 36 tylli ki kynhun kiba iashim bynta ha ka parade kiba kynthup naduh ki Pulit, ki khynnah skul, College bad ki NCC kiba la iashim bynta ha katei ka parade, kaba la ialam da ka tnad Pulit.
Palat shiphew tylli ki jinglehkai kolshor la pyni ha ki jingrakhe, kum shi bynta ban pynphuh pynphieng shuh shuh ia kane ka sngi.
Ha kane ka prokram la wan ban ïashim bynta da u Wailadmiki Shylla uba long u Myntri ka sorkar jylla; u MLA ka Khliehriat konstitwensi u bah Kyrmen Shylla; u heh pulit ka East Jaiñtia Hills District; u Deputy Commissioner, ki heh distrik bad ki ophisar; ki samla pule; ki kmie ki kpa; bad bun kiwei pat.
La pynher ia ka lama da u Wailadmiki Shylla. U la bishar bniah ia ki jingthmu bad jingpynroi jong ka Sorkar Meghalaya haduh mynta, bad u la ai ia ka khubor na ka sorkar jylla. U la ai burom ia ki nongialeh laitluid kiba la iarap ban pynlong ia kane ka sngi bad u la pynpaw ruh ia ki nongialeh laitluid na ka jylla Meghalaya kum u Tirot Sing, U Kiang Nangbah, bad u Pa Tagon M. Sangma. U la ong ba ka Meghalaya ka long kaba riewspah ha ki marpoh khyndew, bad u la kdew ia ka aiñ jong ka jylla kaba ithuh ia ka ktien Khasi, Garo, bad Phareng kum ki ktien sorkar.
U ma Shylla u la pynbna ba yn sa pynkhynriah noh ia ka ïing treikam ka DMHO, East Jaiñtia Hills District sha kawei pat ka jaka kaba kham heh. Ki jingiakren ki dang iaid shakhmat bad ki nongmihkhmat na ka thaiñ shaphang ki jaka sumar CHC, PHC, bad ki jaka sumar. Lyngba ka tnad ialehkai yn plie ar tylli ki artificial turf mynta u snem — kawei ha Wapung bad kawei pat ha ka thaiñ Sutnga la pynpaw shuh shuh u ma Wailadmiki.
