[Ki nongkyrshan jong ka Shree Cement ha ka sngi ba pynlong Public Hearing ha ka 31/07/2026: File Photo]
Ki artylli ki seng ka Khasi Jaiñtia Youth & Student Union (KJYSU) bad ka Indigenous Biodiversity & Social Welfare Organisation (IBSWO) kila ai por 15 sngi ïa ka sorkar MDA- 2 ban weng ne pyndam ïaka Public Hearing jong ka Shree Cement kaba long ha ka 31 tarik July 2026 ha Daistong, East Jaiñtia Hills District Meghalaya kaba khot pynlong da ka Meghalaya State Pollution Control Board (MSPCB).
Kine ki arseng ha ka 10 tarik mynta u bnai kila leit ban ai daka jingthoh sha u Member Secretary ka Meghalaya State Pollution Control Board (MSPCB) u Dr. G. H Chyrmang ha kaba kila dawa ba ka sorkar kadei ban nym pdiang ïa ka ne ka Public Hearing kaba pynlong biang haka 31 tarik July ia kaba la pep myn haka 22 tarik May 2026.
Kine ki arseng ki dawa ban pyndam ïa kane ka Public Hearing halor ki nongrim, jong ka jingbymlah jong ka MSPCB ban bud ryntih ïaki kyndon jong ka Social Impact Assessment (SIA), ka jingbym lah ban pynbiang ïaki jingkheiñ jingdiah kiba biang haka jingïadei bad ka jingktah ïa ki wei pat ki jingthaw kiba im. Ka jingbymlah ban pynbiang ïaki jingïada naki jingktah ïaki wah ki duid, ki tyllong umbam umdih bad ïaki jingthaw ba im kiba don haki um ki wah. Ka jingbymlah ban pynbiang ïaki jingïada ïaki jaka shong jaka sah ki mrad ki mreng bad kiwei pat ki jingthaw kiba im. Ka jingbymlah ban pynbiang ïaki lad jingïada ïaki jingjaboh ka mariang bad ka lyer. Ka jingbymlah jong kane ka Factory ban bud ïaki kyndon jong ka kit ka bah ïa u mar u mata (Limestone) uba mih naka ne ka jaka. Ka jingbymlah ban bat lymne pynneh pynsah ïaka jingneh slem ki jaka ki puta ki lum ki wah ka khyndew ka shyiap kat kum ka hukum bala pynmih daka ïingbishar ba don burom jong ka Ri India ka Supreme Court.
Ka jingbymlah jong ki bor pynïaid ban pynneh pynsah ïaka shongsuk shong saiñ bad ka jingïaid beit ïaid ryntih hakane ka Public Hearing. Hakaba la mih ka huri hura ka jingpakhang lynti, ka jingkawang tears gas, bad ka jingmynsaw bad ka jingbym ïoh lad ki paitbah ban leit pynsngew ïaka sur jong ki.
La dawa ruh baka sorkar kan siew bai lutsan ïa kito kiba mynsaw ha kato ka sngi bad ruh ban pynduh pyndam noh shi syndon ïa baroh kito ki cases ne mukotduma kiba mih naka ne ka Public Hearing, ban kem bad pynshitom kat kum ki kyndon aiñ ïakito ki briew kiba don kti ban tih pynjot ïa ka surok bad ban siew ïaka bai lutsan.
Ki arseng ki ong ruh ba lada ka sorkar kam sngap ïa kine ki mat jingdawa jong ki te kim banse ban leit kiew ïinglieh ïingsaw (High Court).
Ïakane ka juh ka jingthoh ki la ai copy ruh sha u Deputy Commissioner ka East Jaiñtia Hills, Superintendent of Police East Jaintia Hills, Social Impact Assessment, (SIA) Ministry of Environment Forest & Climate change bad sha u Chief Executive Member jong ka Jaiñtia Hills Autonomous District Council. Pynkut ka kyrwoh na u Bah C. Phawa uba dei u President – KJYSU bad Bah G. Lakiang, President – IBSWO.