Ka National People’s Youth Front (NPYF) 2-Jowai Constituency mynta ka sngi Saitjaiñ 18 tarik u Naitung, 2026 kala pynlong ïa ka jingpynkup burom ïa ki samla pule napoh ka Constituency kiba la pass 85% shaneng haka kyrdan SSLC bad HSSLC kaba la tip kum ka “2nd Wailadmiki Shylla Felicitation Ceremony” ha ka jingïalang bala pynlong ha District Library Auditorium Mynthong Jowai.
Ha kane ka sngi u myntri ka tnad ka koit ka khiah, ka kam ïalehkai Sports bad ka Home (Passport) ma Wailadmiki Shylla ula long u kongsan, ha ka jingdonlang u MDC ba shusieh ka JHADC ma Octomewot Lamin kum u symbud kongsan, nalor kiwei de ki riewrangbah bad ki kmie ki kpa jong ki samla pule.
Baroh ki samla kiba la shah pynkup burom kila don haduh 29 ngut kiba la pass 85% shaneng ha ka examination SSLC bad HSSLC jong une u snem 2026.
Ïa ka jingïalang la pynïaid da ka Dahunshisha Sukhlaiñ, la ïoh ka jingduwai na ka Nerila Laloo, ka jingkren pdiang na u Samehi Laloo u President NPYF 2-Jowai Block, ka jingkren na u Resource person ma Eladmiki Suting.
Na ka liang u ma Wailadmiki Shylla ula ai khublei ïa ka NPYF Jowai Block kala la ai mynsiem ïa ki samla pule ka Constituency da kaba pynlong kum kane ka prokram pynkup burom ha ka sien kaba ar, ula ong kam long kaba suk ban kynjoh sha ka jingïoh marks kaba 85% shaneng hynrei kine baroh dei da ka jingtrei shitom bad ka jingminot jong ki khun samla.
Ula kyntu ïa kitei ki samla pule ban ïaitrei shitom shuh shuh ha ka jingpule kot bad don ïaka thong kaba hakhmat kata ban ïakhun ïa ka exam UPSC ban long ki IAS na ka bynta ban thaw ki aiñ ki kyndon ha ka synshar khadar, ula pynsngew naduh u snem 2013 ym don shuh wat tang i wei kiba dei ki trai jyllla ban pass ïa kane ka kyrdan IAS.
