Ka jingsahkut kali kaba jia manla ka sngi ha Jowai, ka dei tang na ka daw ka jingbuh (park) kali ki briew harud jong u surok bah khamtam ha ki bynta ba khamjan jong ka Iawmusiang Jowai, ka wan rah ka jingeh iaki paidbah ba bun balang, khamtam ha ka por leit bad wan skul ki khynnah skul bapher bapher kiba hap iaid lyngba u surok Iawmusiang.
Kum kane ka jingjia shakut (traffic jam) kali ka jia ruh man la ka sngi ha jan jong ka HK Singh Secondary School, Jowai kaba don ha Chutwakhu bad hajan ka madan Iawmusiang, ha kaba ha kane ka jaka ki briew ki pynieng kali khlem jingpyrkhat shuh ia kiwei kiba hap ban iaid lyngba khamtam iaki khynnah skul kaba ktah ia ka por jong ki kumjuh ruh ia ki nongleit bad wan trei bad ia kiwei de.
Dang ha kine ki sngi kiba la dep na ka liang u Deputy Commissioner jong ka Jaintia Hills District, u la pynmih ka jingmana ba ym bit shuh ban buh ne pynieng kali ha ki jaka rud surok kiba hajan jong ka Iawmusiang, hynrei kane kam trei kam imat.
Hynrei dang katto katne mynta la iohi ba ki pulit kila wan ban pyndai Clam ia ki kali kiba pynieng khlem akor bad khlem pyrkhat shuh ia kiwei. Hynrei wat la katta ruh ka jingpynieng ia ki kali ka dang iai bteng haduh hynne ka sngi ha kaba la iohi ba kawei ka Bus jong ki khynnah skul ka la sah kut ryngkat kiwei de ki kali ka ba dei tang na ka daw ka jingpynieng kali khlem akor jong ki briew ha kaba kane ka jingsahkut wat ki kali ar shaka ruh ym lait shuh kaba la shim ka por jong kiwei. Hato haba kumne iano yn kynnoh.