Ka Meghalaya Peoples United Front (MPUF), East Jaiñtia Hills District, lyngba u President jong ka, u bah Kyrshan Blah, ka la aiti ia ka memorandum sha ka ophis jong u Deputy Commissioner, East Jaintia Hills District, ha kaba ki la kyrpad ban maramot ia ka surok NH-6 kaba la sniew bad ban buh ruh ia ki jingker ha Tuber bad ki dak jingmaham.
U bah Kyrshan Blah ryngkat ki dkhot ka MPUF ki la leit ban jurip ïa ka surok NH-6. Haba kren sha ki lad pathai khubor hadien ba la iakynduh ia u Deputy Commissioner u Manish Kumar, IAS, u bah Blah u la ong ba ka Tuber turning ka long ka bym shngaiñ. Ka seng ka la ioh bun tylli ki jingujor na ki nongniah kali, kaba la pynlong ia ki ban leit buh da ka memorandum.
U Deputy Commissioner u la kubur ia kane ka jingeh bad u la ong ba ka ktah ia ki nongleit nongwan bad ki nongniah kali. Ka MPUF ka la kdew ba ka jingtrei ban pynheh ia ka jingkylla jong ka Tuber turning kam pat biang; ki thliew bym pat dep ban shna ki pynbor ia ki nongniah kali khamtam kito kiba shong ha ki kali kiba kham rit ban iaid sha ka liang kaba bakla jong ka surok ban lait na ki jingma. Ka MPUF ka la pynpaw ruh ia ka jingsngewkhia halor ki bynta surok kiba la shah pynjulor bad ki thliew ha Ladrymbai, kynthup ha kawei ka jingkieng.
U bah Blah u la ai khublei ia u Deputy Commissioner uba la shimkhia ia kane ka kam bad u la kyntu ruh ban buh ia ki street light bad ban ker kynroh ha Tuber turning.
Ka MPUF ka la ai por shibnai ban leh eiei bad ka la maham ba lada ym pyn urlong ia ki jingdawa jong ka, kin sa shong jingialang bad ka CEC bad kin pyrkhat da ki wei pat ki sienjam.
