Ki san tylli ki kynhun sengbhalang bapher bapher kiba kynthup ia ka Jaiñtia National Council (JNC), Jaintia Student Union (JSU), Khasi Student Union (KSU), Hima Sutnga Youth Federation (HSYF) bad ka Federation of Khasi Jaiñtia and Garo People (FKJGP), ki la sdang ia ka jingiakhih ka jong ki,da kaba shong kyllaiñ myngngor hakhmat u mot Woh Kiang Nangbah, kaba don ha phyllaw jong ka ophis u Deputy Commissioner, ha Khliehriat, East Jaiñtia Hills District, ban pynpaw ia ka jingpyrshah kaba jur ka jong ki, iaka Public Hearing jong ka Shree Cement Ltd, kaba dang shu dep shen ha Daistong, East Jaiñtia Hills.
Mynta ka sngi ki san seng ki la thang ruh ia ki tyngshop jong u CM Conrad K. Sangma, Dy CM ma Sniawbhalang Dhar bad Prestone Tynsong kumjuh ruh ia ka tyngshop jong u MLA ma Kyrmen Shylla bad ka MLA Santa Marry Shylla.
Kane ka jingiakhih shong kyllaiñ myngngor kaba kynsan kynsan, kadei shi bynta ban dawa naka sorkar jylla ban pyndam noh shi syndon iaka Public Hearing ka Shree Cement bad ban pynioh shwa iaka hok ki trai jaka jong ka Elaka Sutnga bad Nongkhlieh bad iaki nongrep kiba dei trai ha u Lum Syrman.
