Ka Hynniewtrep National Youth Federation (HNYF) East Jaintia Zone mynta ka sngi ka la leit ban ai dorkhas ha u Deputy Commissioner jong ka East Jaintia Hills District ban pynpaw ka jingpyrshah kaba jur halor ka Public Hearing jong ka Shree Cement Limited kaba la buh ban long ha ka 22 tarik May 2026, ha Lum Syrman kaba hap ha ka shnong Shnongrim, Elaka Nongkhlieh, East Jaintia Hills.
Ka Seng ka pynpaw ia ka jingpyrshah ka long namar ba kane ka project ka lah ban ktah jur ïa ka wah Liteiñ kaba dang don shibun jait ki dohum bad ka dei ruh ka tyllong jingim ïa ki paidbah nongshong shnong bad ha kajuh ka por ka lah ban wanrah jingjaboh ïa ka um lyngba ki dawai (chemical) bad ka pum-pum (dust) kaba mih na ka karkhana. Ka Seng ka ong ruh ba ki khyndew ha katei ka thaiñ ki long kiba seisoh bha, hynrei ka jingwan ka cement factory kan pynjulor ïa ka jinglong seisoh jong ka khyndew bad ktah ïa ka rep ka riang jong ki paidbah.
Nalor kata, ka Seng ka pynpaw ba ki cement factory ki ju pynmih bun ka pum-pum bad ki lyer jaboh kiba lah ban ktah ïa ka koit ka khiah jong ki briew, khamtam ki khynnah bad ki tymmen, bad ka jingpyndonkam bun ka um da ka karkhana kan pynhiar ïa ka water table bad wanrah jingduna um ha ki shnong ba marjan. Ka jingïapher ruh ka lah ban mih ha ka mariang lyngba ka jingpom khlaw bad ka jingjulor ka khyndew kaba wanrah ka jingtuid khyndew bad ka jingduh ia ki ba don jingim, katba ka jingpynmih jingsawa na ki machine bad ki trok kit mar kan pynkulmar ïa ka jingim suk jong ki nongshong shnong.
Ka Seng ka ong ruh ba haduh mynta ym pat iohi ba kine ki karkhana ki wanrah jingmyntoi kaba shisha ïa ki trai ri trai muluk hynrei ki shu wan kamai spah bad iehnoh ïa ka mariang ba la julor.
Ha ka ktien pynkut, u President jong ka Seng, u Salty Ryngkhlem u la ong ba “ka jingwan kine ki karkhana haba peit kam shem la iohi ba ka don ka jingioh nong ïa ki trai ri trai muluk, hynrei ki shu wan kamai spah bad pynjot ïa ka mariang,” u la bynrap ba ka Seng kan iai ïeng skhem ban pyrshah ïa kano kano ka project kaba wanrah jingjulor ïa ka mariang bad ka jingim jong ki paidbah, da kaba kyntu ïa ki bor distrik ban shimkhia mardor bad lada ym leh eiei, ka Seng kan hap ban shim da kiwei pat ki lad ban wad jingïada ïa ka mariang bad ka hok ki paidbah.