Da ki hajar ngut ki paidriewngeit jong ka Balang Katholik napoh ka Diocese Jowai, Archdiocese Shillong bad Nongstoin Diocese bad kiwei de ki kynhun Balang ki la ia tuid sha shnong Syndai kaba hap hapoh ka Parish Syiem Jingsuk Parish, Amlarem Civil Sub-division ban ia sakhilang ha ka jingpynkyntang Lyngdohniam (Lyngdohsohblei) ia u Dikon Francis Lamin Gayang hynne ka sngi (14/04/2024) ha shnong Syndai.
Ia u Dikon Francis Lamin Gayang la pynkyntang Lyngdohniam ia u da u Rt. Rev. Ferdinand Dkhar DD, Bishop ka Jowai Diocese, kum juh ia ka jinglehniam bad ia ka jingkñia Mas Iukharist bakhuid la lamkhmat da u da u Bishop Ferdinand ha ryngkat ka jingiasynran lang u Lyngdoh thymmai (Rev.Fr. Francis Lamin Gayang) bad kiwei de ki Lyngdohsohblei napoh ka Diocese Jowai bad nabar.
U Bishop Ferdinand Dkhar ha ka jingkren sneng kren kraw jong u ia u Lyngdoh thymmai bad ia ki Paidriewngeit, u ong ba hapoh ka Balang Katholik ban long u Lyngdohniam ka long ban shakri ia u Blei bad iala ki parabriew. Nangta u ong u Lyngdohniam u dei u riew aiti lut ban shakri ia U Blei, iala ki parabriew bad u Nongpynbna ia ka Khubor babha U Khrist Jisu hapdeng ki parabriew bad ban kyntiew ia ka imlang ka sahlang. U Lyngdohniam u long ruh u Nongkñia jingkñia (Mas bakhuid) u nongsam ia ki jingmaia ba iohi jong U Blei ha kane ka pyrthei bad u Nongpyniasuk ba kynja mynsiem hapdeng u briew bad U Blei.
U Bishop Ferdinand u pynkut ia ka jingkren jong u da kaba kyntu ia ki paidriewngeit ban pynshlur ia ki khun samla jong ka Balang ba kin tur sha ka jinglong Lyngdohniam bad sha ka jinglong riewniam ban long ki riew aiti lut na ka bynta ban shakri ia U Blei, ban pynbna ia ka Khubor babha jong u hapdeng ki parabriew bad ban tei ia ka Balang bad ia ka imlang ka sahlang hapdeng ki para briew ha kano kano ka jaka kaba ki don.
