Ka Khimusniang Presbyterian School, Jowai mynta ka sngi Palei 26 tarik u Lber, 2026 kala rakhe ïaka ‘Silver Jubilee’ ne ka jingdap 25 snem ka jingshakri haka liang ka jingnang jingstad. Ïa kane ka skul la seng haka snem 2001, halor ka motto kaba ong ‘Marching Onward’ da ka jingïohi jngai jong ki nongïalam ka Balang.
Ïa ka jingïalang la pynlong ha phyllaw ka Indoor Sports Hall jong ka Dorbar Shnong Khimusniang, Jowai. Haka jingdonlang u kongsan Rev. P. Myrchiang uba dei u Moderator KJP Synod Mihngi, TBn. J.M. Bang Moderator Jowai Presbytery kum u Symbud Kongsan, ka Dr. Wa i sa Sumer ka DSEO, West Jaiñtia Hills District, nalor ki Pastor, ki Tymmen Basan ka Balang, ki nonghikai, ki khynnah skul bad ki nongshah khot sngewbha.
U Rev. P. Myrchiang haba ai jingkren ula pynsngew ‘kane ka dei ka sngi sah jingkynmaw ïa u kum u kongsan haka sien kaba nyngkong eh, lyngba ka jingrakhe dap 25 snem ka Khimusniang Presbyterian School, Jowai.
U kyrmen skhem ba ka skul kan dang ïaid shakhmat haka jingshakri haka liang ka jingnang jingstad, da kaba u pynkymmaw na ka jingrwai Salm 118: 24-25 kaba ong “Kane ka sngi ka long kaba U Trai ula pynlong; ngin shadkmen ha ka. To pynim mynta ngi kyrpad ïa me, A Trai: ngi kyrpad ïa me, A Trai, to pynroi mynta”.
Ula ai mynsiem ïa baroh ki skul jong ka Presbyterian ki dei ban don ka jingïaleh mynta bad kiwei de ki skul, na ka bynta ka jingshai jong u Trai bad u nongpynim U Jisu Khrist bad ban long kiba beh sha ka thong jong ka jingjop.
Shuh shuh ula kyntu ban long kiba khlaiñ haka jingshakri lyngba kane ka jingrakhe dap 25 snem bad dang don sa 25 tylli ki snem ban kynjoh sha ka 50 snem (Jubilee Ksiar), ula kyntu ïa ki khynnah skul ban long kiba minot ha ki jingpule bad ban don ka mynsiem jingïaleh haka jingim ban long ki lawei ba phyrnai.
U TBn. P. Bamon kum uwei na (Founding member) ula pynsngew halor ka nongrim ban seng ïa kane ka skul jong ka Balang kaba la ïaid lynti haduh une u mawmer jong ka jingshakri 25 snem wat hapdeng ki jingeh kiba bun, ula buh ka jingkyntu ïa ki nonghikai bad ki nongpynïaid ba kin bteng ïa kane ka jingshakri da kaba ong wat pynjah ïaka kyrteng ka skul kaba la seng la 25 snem mynta.
Ka Dr. Wa-i-sa Sumer kala ong ka jingïohi jngai jong ka skul ban plie sa ka Higher Secondary School kala long kaba donkam eh haka jingshakri, da kaba ong ïa ki kyntien ‘haba don U Blei baroh ka long kaba lah’, kala ai khublei ruh ïa ki bor pynïaid ka skul kiba la ïatreilang bad ka tnad pule puthi ha kiba bun ki liang.
Ha kane ka sngi la pynphuh pynphieng ïa ka jingïalang da ki jingrwai, ki jingshad na ki nonghikai bad ki khynnah skul, ka jingpynher ïa ka lama Silver Jubilee, ka jingpyllait ïa ka Souvenir bad ka jingot ïa u Cake jong ka jingdap 25 snem ka skul. Ha kane ka sngi la sam ruh ïa ki Momentos sha ki san ngut kiba don bynta ban seng ïaka skul.
