Ka Jaiñtia Youth Federation (JYF) ha ka jingïalang ba kyrkieh kaba la shong ha ophis treikam ka seng ha Jowai, kala shim ïa ka rai ban ai da ka dorkhas ha u Myntri Rangbah ka jylla Meghalaya halor ka jingdawa ban kyntiew kyrdan ïa ka Jowai Polytechnic sha ka full-fledged Engineering College bad ban shna ïa ka Campus ka Captain Williamson Sangma State University hapoh ka thaiñ Ri Jaiñtia.
Ka seng mynta ka sngi 23 tarik u Ïaïong, 2026 ka la leit aiti ïa kane ka dorkhas sha u Myntri Rangbah ka jylla lyngba ka ophis u Deputy Commissioner ka West Jaiñtia Hills District, Jowai.
Ha kane ka dorkhas (memorandum) ka Federation ka dawa kyrkieh ban kyntiew kyrdan noh ïa ka Jowai Polytechnic sha ka full fledged Jowai Engineering College bad ban shna kyrkieh ïa ka Campus jong ka State University ba thymmai ka Captain Williamson Sangma State University hapoh u pud u sam ka Ri Jaintia.
Ïa ka jylla Meghalaya la phiah ha ki lai bynta kata i) ka Khasi region kaba la ïoh shibun jingkyrkhu ha ka roi ka par kum ka jingkyntiew kyrdan ïa ka Shillong Polytechnic sha ka Shillong Engineering College, ka Shillong Medical College bad kiwei kiwei. ii) ka Garo region ka la ïoh Shibun ki jingkyrkhu ha ka educational infrastructures kum ka Tura Medical College bad kiwei bad iii) Ka Jaiñtia region kane ka bynta ba lai ka jylla ka long kaba sahdien palat khamtam ha ka educational infrastructures, hangne don tang ka Jowai Polytechnic kaba ai jinghikai diploma course etc, pynpaw ka JYF.
Shuh shuh ka seng ka pynpaw jingsngewkhia jur halor ka jingnoh shilliang ka tarajur ka sorkar jylla ha kaba ïadei bad ka educational infrastructures bad kiwei de ki kam pynroi hapoh ka thaiñ Ri-Lum Jaiñtia haba ïa nujor bad kine ki artylli ki thaiñ ka jylla Meghalaya.
Halor kine ki nongrim ka Federation kaba mihkhmat na ka bynta ki paidbah ka Ri Jaiñtia kala dawa kyrkieh na ka sorkar jylla lyngba u Chief Minister ka jylla ban pynkiew kyrdan ïa ka Jowai Polytechnic sha ka full-fledged Jowai Engineering College, da ka jingkyntiew kyrdan ïa kane ka institution shibun ki samla pule ka thaiñ kiba thrang ban pule engineer kin ïoh lad bad ki kmie ki kpa kin kham suk ha kaba phah ïa ki khun shabar ka thaiñ bad shabar ka jylla.
La buh ruh ka jingdawa ban shna kyrkieh ïa ka Campus jong ka state university ka Captain Williamson Sangma State University hapoh u pud ka Ri Jaiñtia, da kaba buh ne shna ïa kane ka Campus ki khun samla ka Ri Jaiñtia kin ïoh lad ban pule ha ki kyrdan ba kham halor bad pynsuk ïa ki kmie ki kpa ban pynlut pisa ban phah ïa ki khun shabar ka thaiñ ne shabar ka jylla.
Na ka liang ka seng ka ngeit bad kyrmen skhem ba ka sorkar jylla hapoh ka nongïalam u Conrad Sangma kan bishar bad ai ïa ki jingdawa ka seng na ka bynta ka bha ka miat jong u paid ka Ri Jaiñtia bad lyngba kane ki paidbah jong ka thaiñ kin ïoh ka jingshaniah kaba pura ïa ka sorkar MDA-II.