Ki nongshong shnong jong ka shnong Shnongrim kaba hap hapoh ka Elaka Nongkhlieh, East Jaiñtia District, hadien ba ki la dep ai da ka jingthoh ha u Deputy Commissioner jong ka East Jaiñtia District, ha kane sngi Wednesday, mynta ka sngi pat 23.04.2026, ki la ai leit ai biang ia ka jingthoh sa sha ka ophis u Member Secretary ka Meghalaya State Pulution Control Board (MSPCB), Shillong, ha ka jingiadei bad ka jingpyrshah ia ka jingthmu ban pynlong ia ka Public Hearing, na ka bynta ban tih ne khlong ia u Mawshun na ka jaka kaba la tip kum ka Lum Syrman kaba don ka jingheh haduh 217.394 hecter, da M/S Shree Cement Limited, kaba la buh ban long ha ka 22 tarik u bnai May. Ha kane ka dorkhas la don haduh 85 ngut ki nongsoi kyrteng kiba don jaka ha katei ka Lum Syrman.
Na ka liang ki nongshong shnong katei ka shnong kiba dei ruh ki trai katei ka jaka, ki la pynpaw ia ka jingpyrshah kaba jur ia katei ka jingthmu jong ka M/S Shree Cement Limited, da kaba ki la ong, “Kumno katei ka Cement Plant ka nud ban kamtrai ia katei ka jaka jong ki, khlem kano kano ka jingtip jong ki trai jaka namar ngi khlem ai bor ne die ia ka jaka sha katei ka company. Sa kawei ruh katei ka jaka ka dang dei ka jaka rep jaka riang jong kiba ki nongshong shnong jong ka Shnongrim”.
Ha kaba na ka liang jong kitei ki trai jaka ki la dawa pyndam ne sangeh noh shisyndon ia katei ka jingthmu hapoh hynniew sngi na ka bynta ban pynlong ia ka Public Hearing na ka bynta ka jingtih ia u Mawshun na katei ka jaka. Na ka liang jong kitei ki trai jaka ki la phah ruh ia ki bor ba dei peit ban jurip ia katei ka jingleh jong katei ka company ban ai ka jingiada ia katei ka jaka rep jong ki, namar ka la pyndonkam bakla ia ka jaka jong ki riew shimet.
