Ka KSU EJHDU dang shen hapoh ka jingialam jong u Samla Rangbah Streamly Suchen President ka District bad Samla Rangbah Kwilinis S. Suchiang General Secretary ka District Unit ki la ioh ban iakynduh bad ban pynsngew ia ar tylli ki mat kiba donkam jong ka District ha khmat u Deputy Commissioner ka District u A. Baranwal, IAS.
Ka seng ka la ioh ban ai ia ar tylli ki dorkhas bad kita ki long ban pynkloi ia ka Disaster Management Relief fund sha ki lanot ba shah pynjulor ha ka mariang bad halor ka jingdawa ban soi ia ka Memorandum of Agreement (MoA) bad ki company ba don ha ka thaiñ bad ka District Administration halor ban ioh placement lane Direct Recruitment ia ki samla wad kam kiba shah pyntbit ha ka ITI Khliehriat branch East Jaintia hills district ka ban sa sdang noh.
Kum ban shu pynkynmaw ba ka seng ka la leit ban pynsgew sha u DC halor ka relief fund dei halor ka nongrim ba kiba bun bah kiba ujor sha ka seng halor kane ka mat bad da ki snem ki khlem pat ioh iakane ka jingiarap na ka District bad haba iakren bad u DC halor ka relief fund na bynta ki ba shah ktah ha ka bor mariang u la ong ba ki ialeh ban ai mar mar katba lah bad u la pyntip ba ka District ka la don ruh iaka advanced fund kaba Rs.20 lakh eiei ha kaba lyngba kane yn ioh ban iarap mar mar ia kiba lah shah ktah jur eh khamtam kiba don ka jing duh noh iala ka jingim ha ka bor mariang.
Shuh u la ong baka jingslem jong ka relief fund ha ki snem ba la leit ka long ba ka pisa ba la mang ka wan beit na Revenue Department bad ka District Administration kam pat ioh ka bor ba pura ban ai beit mar mar ia ki relief fund sha ki lanot hynrei mynta ka kynti ka la pher ka rukom pyniaid bad mynta ka la lah ban ai kloi na ka daw jong ka jingioh bor u DC jong ka District ban ai mar mar ia ki lad jingiarap.
Na ka liang ka seng ka la ioh jingtip bad pyntip ruh ba ki briew kiba shem kum kine ki jingjia ki lah ban pyntip sha ka seng ha kano kano ka por bad ka seng ka pyntip ruh ba kiba shem kum kane ka apot ki hap ban ujor FIR mar mar halor ka jingshah lynshop bad ruh ki dei ban ioh ruh ki syrnot pynjulor (damage certificate) na ki bor ba dei peit lane ki Rangbah Shnong bad ruh kin hap ring da ki video bad shon dur ia ki jingjulor bad phah mar mar sha ki bor ba dei peit.
Ha kum kane ka por ba lah sdang u slap bad ka lyer ka seng ka kyrpad ia ki nongshong shnong ban husiar bad ban pyntip halor kino kino ki jingjia kiba kum kine.
Ka seng ka ha kane ka sngi ka la ioh ruh ban pynsngew ia ka mat haba iadei bad ka ITI Khliehriat Branch East Jaiñtia Hills district ka ban sa sdang noh ha une u snem. Kum ban shu pynkynmaw ba na ka liang ka seng ha ka jingiaid lynti ban dawa ia kane ka shlem ai jinghikai ka la long kaba jop bad ka ai khublei ruh khamtam ia ka Kong Santa Mary shylla kaba la pynsgew ia kane ka mat ha ïing Dorbar Thaw aiñ ka jylla bad na ka liang ka sorkar ruh ka la shim khia.
Ka seng ka khmih lynti ruh ba kan nym don ka jingthud ha ka ban pynurlong iakane ka shlem hynrei ka seng lyngba ka shithi ba la pynsngew sha u DC ka ai jingmut bad dawa ruh ba na ka liang ka District Administration kan soi ia ka MOA lane Memorandum of Agreement bad ki company kiba don ha ka District ha kaba kine ki company ki dei ban pynrung kam ia ki samla wad kam kiba pass na kane ka ITI sha ki company jong ki katba lah bad ym ban duna 5-10 ngut ha ka shi snem ha kawei ka company bad ka kino kino ki jingtbit ba kine ki samla ki don la ha ka kam welding, technician, mechanical bad kumta ter ter.
Ka seng ka la ai jingmut ruh ia ki katto katne tylli ki course ki ban don ha kane ka shlem ai jinghikai ha u snem ba la dep bad ka seng ka khmih lynti ba kane kan iarap shibun ia ki khun samla wad kam wad jam jong ka District.