Ki sengbhalang kiba kynthup ia ka KSU, FKJGP bad kiwei ki la thang ia ki kot kyndon jong ka Citizenship Ammendment Act (CAA) hadien ka jingialang ba long ha mot u Kiang Nangbah ha Khliehriat, East Jaiñtia Hills mynta ka sngi 4 tarik u Iaiong 2024.
Kane ka jingthang ia ka CAA ka long ban pynpaw ia ka jingpyrshah jur ia ka sorkar India ban pyntreikam ia katei ka aiñ ha Meghalaya bad ha baroh kawei ka thaiñ North East.
Ki sengbhalang bapher hapoh ka jingialam ka KSU bad FKJGP ki la pynlong ia ka rally ban pyrshah ia ka jingpyntreikam jubor ia katei ka aiñ hapoh ka jylla.
U President ka KSU EJH, u Streamly Suchen u la ong ba ka jingpyntreikam ia katei ka aiñ kan ktah ia ka jylla namar ba ki nongwei kum ki Hindu na ri Bangladesh bad na kiwei kin ioh lad ban kiew sha ri lum Khasi Jaiñtia.
U la iathuh ruh ban kan sa don ka rally jong ki sengbapher bapher ka ban lamkhmat da ka North East Students Union (NESO) ha Nongbah Delhi ha kine ki khyndiat sngi ban wan.