Ka ïing bishar District and Sessions Judge, West Jaiñtia Hills District, Jowai ha kane ka 3.04.2024 ka la rai pynrem da kaba set phatok shi jingim, ia ki ar ngut ki rangbah kiba la lap ba ki donkti ha ka ban pyniap dusmon ia u wei u briew ba la tip kyrteng kum u Prodic Nongbah kaba la jia ha u bnai May jong ka snem 2014 ha shnong Mynkrem, West Jaiñtia Hills District.
Katkum ka jingpyllait khubor na ka ophis jong u Superintendent of Police Jowai la iathuh ba ha ka 6.05.2014 la ioh ia ka jingujor ejehar ha Nartiang PIC ha kaba la kynnoh ba ki lai ngut ki briew kiba kynthup ia u Chalbinal Nangbah, u Salbinal Nangbah bad u Belting Tyngkra ki donkti ban pyniap dusmon ia u Prodic Nangbah.
Ha kaba iadei bad kane la register ia ka case katkum ka Jowai PS case No. 120(5)14 U/S 302/34 IPC, ha kaba la thung ia u Sub-Inspector (SI) C. Lamare ban tohkit halor kane ka jingjia.
Hadien shiphew snem ba iaid ka jingbishar dei hynnin ka sngi (3.04.2024) ba ka ïingbishar District and Sessions Judge, West Jaiñtia Hills District, Jowai kala rai pynrem noh ia ki ar ngut kiba donkti ban pyniap ia u Prodic Nangbah ba kynthup ia u Salbinal Nangbah bad u Belting Tyngkra na ka shnong Mynkrem da kaba rai set phatok shi jingim ryngkat bad ka kuna ba Rs.5000/- (San hajar tyngka) marwei.
Katba uwei pat uba suba donkti kata u Chalbinal Nangbah ka ïingbishar kam ioh shuh ban shim rai namar ba ula khlad ha ka 6.04.2017, hapoh ki por ba dang iaid ka jingbishar ia kane ka case.
Ka ïingbishar ka la hukum ruh ban siew bai lutksan Rs.3,00,000/- (Lai lak tyngka) sha kiba ha ïing jong uba la khlad noh, pynkut ka khubor Pulit.