Katkum ka khubor ba la phah da u Secretary ka Jaintia Coal Owner Miners Supplier & Workers Association (JCOMSWA) u ma Khrawbor Ryngkhlem, ula pyntip ba na ka daw jong ka shitom high BP bad shini jong u ma Mewanpor Biam, kumta la hap ban pynkynriah noh ia u na katei ka jaka shah thngan kaba ha Madanbol jong ka Ladrymbai Dongwah, East Jaintia Hills District.
Kumta na ka liang jong ka Association ka la bujli noh da u ma Shemphang Langstang, uba na ka shnong Sutnga uba dei ruh ha kajuh ka por u Chairman jong ka JCOMSWA kaba la sdang naduh ka por 6:00 baje janmiet mynta ka sngi (21-06-2026).
Haba kren sha ki lad pathai khubor u ma Shemphang Langstang u ong, ba da ka jingbym banse na ka bynta ka ri bad ka jait bynriew u kloi ban shong shah thnga ialade, khnang ba ka sorkar kan thaw ki lad ki lynti ha ka jingiadei bad ka jingpyllait noh ia ka jingtih dewiong, ha ka rukom ba kiba bun ba lang ruh kin ioh lad lem ban tih bad khaïi ia u dewiong.
Kumban shu pynkynmaw ba u ma Mewanpor Biam ula ioh lad ban shong shah thngan tang haduh 26 kynta.