Haka kyrwoh bala phah lyngba u President ka Jaiñtia National Council (JNC) Central Executive Committee, u bah Sambormi Lyngdoh haka 15 tarik August 2026, ka seng kala ong ba hadien bala iohi iaka statement jong u Myntri Rangbah ka jylla u Conrad K Sangma, halor kato ka Public Hearing kaba dang shu dep ha East Jaiñtia, ba u la ong ba ka sorkar kala dep ban phah ia u DC ban leh iaka jingtohkit halor kaei kaba la jia khamtam halor ka jingshah khlong jong u surok PWD daki nongkyrshan ka Shree Cement, ula ong ruh ba ki don ki paidbah kiba kmen halor kato ka Public Hearing, hynrei kumba ka paw hi shabar ba don shibun bah kiba pyrshah bad kiba shah khanglad ban wan sha ka Public Hearing ban iashim bynta bad la iohi ruh iaka jingshah leh donbor bad shah thombor jong kiba bun da kaba pyndonkam daki bor pulit bad ki Local Mafia jong ka Shree Cement Ltd.
U la ong “Ngi kum ka seng kaei kaba ngi kwah ban pynpaw hangne bad ban phah kane ka kyrwoh sha u CM ba don burom jong ngi ba ka jingdawa hi ka jong ngi kata naduh na sdang ba ka JNC ka ieng haka nongrim kata ym naka bynta ka Shree Cement ne ym naka bynta kano kano ka company hynrei ka nongrim hi ka jong ngi kaba shai kata ba u “Lum Syrman” hi u dei ka jaka rep iaki spah tylli ki longïing nongrep bad kiba shaniah iaka jakpoh jong ki na une u lum Syrman. Kaba ar ki don daki spah ngut ki trai jaka kiba la long trai ha uto u lum Syrman, hynrei ka jingkylli hi ka long mynta ba mano ban bahkhlieh ia kine ki jingjia, mano pat ban ai iaka hok kito ki nongrep bad mano ban ai iaka hok ki trai jaka hangto ha u lum Syrman.
Ngi iohi ruh ba halor kane ka Shree Cement u CM ba donburom jong ngi ula ai bun ki statement halor jong ka hynrei kaba sngewsih pat ba tang shisien ruh ngim ju iohi ba kren shaphang ka jingleh donbor bad jingshah knieh jubor jong ki trai jaka bad ki nongrep ha uto u lum Syrman”.
Dang ha kine ki sngi naka liang jong ka seng haka 13 tarik une u bnai, ka la dep ban ai jingthoh sha u CM jong ka jylla, halor ki ar tylli ki jingdawa kata kaba nyngkong ka long ban wad iaki lad ki lynti ba kumno ban ïarap ia kine ki nongrep ki ban shah ktah naka jingpyntreikam iaka mining project ka Shree Cement ha u lum Syrman lada iaid shakhmat bad ban ai iaka hok ba pura sha kine ki trai jaka kiba dei hok ban ioh bad ka seng kala ai por ruh iaka sorkar haduh 10 sngi bad hadien shiphew sngi lada ka sorkar kam leh eiei naka liang ka seng kan sa bteng biang iaki jingiakhih halor ki jingdawa ki jong ki lyngba ki jingiakhih bapher bapher.
U la ong ruh “Kumba ka jingiakhih ka jong ngi naduh ba sdang halor ki trai jaka bad ki nongrep, naduh kato ka rally bala pynlong ha Shillong ngi la kreh shai sha ka sorkar ba ka jingialeh ka jong ngi kam dei bad ka Shree Cement, hynrei ka dei beit bad ka sorkar namar ngi sngewthuh shai kdar ba lada ka sorkar kam don liang bad kane ka Shree Cement, kam ym nud ban leh ia kine ki kam thombor.
Te ngi kum ka seng ngi kwah baka sorkar ha shwa ba kane ka shiphew sngi kan kut ka sorkar ka dei ban leh eiei halor kine ki jingeh jong ki trai jaka bad ki nongrep baki iakynduh namar lada ka sorkar ka sngap jar kumne te ka jingkylli pat ka long ba shaei ngin dawa iaka hok ka jong ngi lada ngim mih ha surok lada ngim iaid daka lynti ka jingiakhih, te ka khubor kaba shai shaka sorkar ban thuh iaki lad ki lynti ba kumno ban wanrah iaka Synshar kaba khuid ka jingbishar kaba hok iakine ki trai jaka bad ia kine ki nongrep ha elaka Nongkhlieh khamtam kito kiba don ha u Lum Syrman”.