Ki nongshong shnong jong ka shnong Shnongrim kaba hap hapoh ka Elaka Nongkhlieh, East Jaiñtia Hills District, kiba don jaka rep ha Lum Syrman, mynta ka sngi ki la leit ai da ka jingthoh ha u Deputy Commissioner jong ka East Jaiñtia Hills District, halor ka jingthmu ka Meghalaya State Pollution Control Board (MSPCB), ban pynlong ia ka Public Hearing, halor ban tih ne khlong ia u Mawshun na ka jaka kaba la tip kum ka Lum Syrman ka jaka kaba don ka jingheh haduh 217.394 hectare, da ka M/S Shree Cement Limited, kaba la buh ban long ha ka 22 tarik u bnai May.
Mynta ka sngi hadien ba la aiti ia ka jingthoh ha u DC, na ki liang ki nongshong ka Shnongrim kiba long ruh ki trai jong katei ka jaka, ha ba kren sha ki lad pathai khubor ki la ong ba ki la ai por hapoh hynñiew sngi ban pyndam noh ia katei ka jingthmu ban pynlong ia katei Public Hearing na ka bynta ban khlong ia u Mawshun na Lum Syrman.
U ma Bunlangki Sukhlaiñ, u la ong ba hadien ba ki la iohi ia ka Notice halor katei ka jingthmu jong katei ka company ban khlong ia u Mawshun na katei ka jaka, ki la dap da ka jingsngewphylla namar ki khlem pat ai bor ne die ia kitei ki jaka sha kano kano ka company, namar kumba long mynta katei ka jaka ka dang dei ka jaka rep jaka riang jong ki haduh mynta, dei halor kane ka nongrim ki la wan ban ujor bad kyrpad ia u DC ban ban peit bad bishar ia kane ka kam da kaba phah pyndam syndon ia kane ka jingthmu. U la ong ruh ba katei ka jaka Lumsyrman ka dei ka tang ka jaka rep jaka riang naduh ki por mynshwa, hynrei ka company pat ka la ong ba ka dei ka shnong bad kumjuh ruh ka Block A, ha kaba na ka liang ka shnong kam don jingtip ei ei halor kane ka jingjer kyrteng ia katei ka jaka.
U samla Prince Sukhlain u la ong ba ngi wan hangne ban dawa ia ka hok jong ngi kaba la buh naduh u mynbarim bad ka dei ruh ka jaka rep jaka riang jong ngi, kumno kane ka company ka nud ban kam trai bad jer kyrteng kulmar ia katei ka jaka.
U ma Sonny Born Phyrngap, u la ong ngi kyrpad ym tang ia ka ophis u DC, hynrei ia kino kino ki department kiba ba don bynta ban pynlong ia ka Public Hearing ba ki dei ban sangeh ia kane ka jingthmu ne pyndam syndon ia ka, da kaba u la pynpaw ba baroh ki nongshnong shnong bad ki trai jaka ha katei ka jaka ki pyrshah jur ia katei ka jingthmu katei ka karkhana.
U Arwonki Sukhlain, u la ong ba ngi dap da ka jingkyndit bad sngewphylla hadien ba ngi la ioh pdiang ia ka shithi na ka MSPCB halor ka jingthmu ban khlong ia u mawshun na katei ka jaka, da kaba u pynpaw ruh ba katei ka jaka kam dei ka shnong hynrei ka jaka rep jaka riang jong ki nongshong shnong ka shnong Shnongrim.
Na ka liang u Deputy Commissioner, EJHD u la ai jingmut ia ki nongshong shnong ka Shnongrim ba kin ai da ka jingthoh sha ka Meghalaya State Pollution Control Board (MSPCB), halor kine ki jingpyrshah jong ki trai jaka kiba na ka shnong Shnongrim.
