Mynta ka sngi (22/04/2026) ka Chantremi Clinic kaba don ha Ladsutnga, East Jaintia Hills District kala ioh ban plie paidbah ia ka Ultrasonography Machine kaba long shi bynta ban pyniar shuh shuh ia ka jingsumar hapoh katei ka Clinic.
La wan ban plie paidbah ia kane ka Machine da u MLA jong ka Khliehriat u ma Kyrmen Shylla, ha ka jingiadonlang ki MDC ka JHADC ba kynthup ia u Dr. Sankey Shangpung bad u ma Krison Langstang, u President ka MPUF ma Kyrshan Blah, u trai jong kane ka Clinic u Embhah Lamare bad Novel Shylla nalor kiwei de kiba shah khot sngewbha.
Hashwa ban ot ia u ribbon la ioh ia ka jingduwai kyrkhu bad ka jingkynshait um bakhuid ia kane ka Machine, ki kor Computer bad ia ka kamra da u Phadar Glorius Shullai
Kane ka Clinic ka don 10 ngut ki nongtrei kiba peit ha la ki jong ki jong ki kam jingsumar ba kynthup ia ka Ultrasound, gynaecologist, OPD, ENT bad ultrasonography.
Haba kren ha kane ka sngi u ma Kyrmen ula pynpaw ba ka jingdon jong kane ka Clinic ka la iarap shikatdei ban kyntiew ia ka jingsumar hapoh East Jaintia Hills, khamtam ia ki nongshong shnong jong ka thaiñ kiba duk ba kyrduh naduh ba la khang ia ka jingtih dewiong, kala iarap ia ki ban lait na ka jingleit Shabar na ka District ban ioh ia ki jingsumar.
U ma Kyrmen ula ong ruh ba ka jingdon ki tiar sumar kiba biang ha kane ka Clinic kan iarap ruh ia kito ki nongleit nongwan kiba dei iaid lyngba ia u National Highway, ula iaroh shi katdei ia ki trai jong kane ka Clinic halor ka jinglah jong ki ban pynbiang ia ki kor ki bor kiba donkam katkum kane ka juk jingsumar. Ula khmih lynti ba nangne shakhmat kane ka Clinic kan dang lah shuh shuh ban ai ka jingshakri ka ba biang bha ia ki nongshong shnong ka thaiñ.
