Ia ka Nutrition-cum-Health Mela la pynlong ha ka 22 tarik mynta u bnai ha Amlarem Sub-Division, kum shi bynta na ka jingrakhe ia ka jingdap 50 snem jong ka Amlarem Civil Sub-Division.
Ïa kane ka prokram la pynlong ha Syiem Jingsuk Parish Hall, Amlarem, ba la pynlong da ka Child Development Project Officer, ICDS Project Amlarem, West Jaiñtia Hills District.
Ki tnad sorkar bapher bapher ki la buh ia ki stall ban pyni ia ka jingshakri, ki skhim bad ki prokram jong ki, kiba thmu ban pynsngewthuh ia ki paidbah.
Ha ka jingkren jong ka SDO Civil, ka Smt. Vevotolu Kezo, IAS ka la pynpaw ïa ka jingkmen ban don lang hapdeng ki paidbah kiba la ïalum lang bad ka la ai ruh ka jingïaroh ïa ka jingïashim bynta shitrhem jong ki paidbah. Ka la ai khublei ia baroh ki nongiashim bynta bad ka la ban jur ba kum kane ka prokram kaba tei bad pynkup bor ia ka imlang sahlang ha ka bor khlain jong ka met, kaba koit ba khiah ha ka jingmut jingpyrkhat.
Ka la ban jur ia ka jingdonkam jong ki 1000 sngi ba nyngkong jong ka jingim jong u khynnah, naduh ba kha haduh ka rta kaba ar snem, da kaba ong ba ka jingbam kaba biang bad ka jingsumar ia ka koit ka khiah na ka bynta ka kmie bad i khunlung ha kane ka por ka long kaba kongsan bha. Ka la pynpaw ruh ia ka dor jong u kew kum u jingbam uba tei met, uba lah ban ioh ha ka thain. Ka la ban jur ruh ia ka jingdonkam ban ai tika ha ka por kaba biang. Ka pynshlur ia ki samla pule bad ki paidbah, ban pyndonkam pura ia ka jingshakri ba la ai ha kane ka Mela.
U Dr. Arvin Khonglah Sub-Divisional Medical and Health Officer, u la pyntip ba ka tnad ka Koit ka Khiah ka la buh bun tylli ki stall kiba ai jingshakri kum ka jingpeit bniah ia ki khmat jong ki samla pule, ka jingpeit bniah ia ka jingduna snam bad ka jingduna iron, ka jingai jingmut halor ka jingkoit jingkhiah ha ka bor pyrkhat, bad ka jingpeit bniah ia ka jingroi jingsan da ki kynhun jong ka RBSK.
U la pynpaw ba kine ki jingthmu ki long ban kyntiew ïa ka jingkoit jingkhiah ha ka met bad ka jabieng jong ki samla pule. U la pynpaw ba ka jingduna iron ka long kaba ju jia bad ka lah ban ktah jur ïa ka jingpule bad ka jingkynmaw, da kaba pynpaw ïa ka jingdonkam ban leit peit bniah ïa ka koit ka khiah man ka por bad ban ioh ïa ka jingïarap ha ka por kaba biang.
U la kdew shuh shuh ba ka jingbym biang ka jingbam ka long ka jingeh jong ki samla pule bad u la ban jur ïa ka jingdonkam jong ka jingbam kaba biang bad ka jingbam kaba tei met. Nalor ki jingpeit bniah ia ka koit ka khiah, la ai jingmut ruh halor ka jingbam bad jingbam kaba biang lyngba ki nongmihkhmat jong ka ICDS bad SHG.
Ka Smt. Ka kong Iarisalang Pohshna, ka Lady Supervisor ka ICDS, Amlarem, ka la pynpaw ïa ka jingdon kam jong kane ka sngi, da kaba kdew ba ka jingrakhe ïa ka Jubili Ksiar ka la pynïasoh lang ïa ki tnad treikam bapher bapher ban pynlong ïa kane ka prokram kaba shisnem kaba don jingmut bad kaba don jingmyntoi.
Ka la pyntip ba ïa kane ka Nutrition cum Health Mela la pynlong ban pynsaphriang ïa ka jingtip halor ka koit ka khiah, ka jingbam bad ki skhim ka sorkar.
U Fr. U Peter uba dei u Principal jong ka Syiem Jingsuk Higher Secondary School ruh u la wan ban ïashimbynta ha kane ka prokram.
La ioh jingkren ruh na ka kong Shelomi Syngkon.
La sam ruh ia u kew sha ki longkmie kiba armet. La pynkup burom ïa ka Rimika Pohshna na Pdengkarong kum ka Anganwadi ba tbit.
Ia ka jingaikhublei la ai da ka kong C. Shylla, ka ba dei ka Child Development Project Officer, Amlarem.
