(Da u S.B.Sutnga)
Ki Karbi kiba shong basah ha shnong Samatan, Wanpung (Ummaleng) bad Rongkhlan ki dei ki shnong kiba hap hapoh u pud u sam jong ka Elaka u Daloi Shilliang Myntang bad kiba dang shu wan buhai shnong hadien ka jingai District ïa ka Mikir bad North Cachar ha ka snem 1951.
Hashwa ba kine ki Mikir ne ïa kiba la tip mynta kum ki Karbi, kin wan buhai shnong da ka jingbit na ka Dorbar Elaka Shiliang Myntang, haba ki wan ki shu rep lum naba ïa ki Hali ki pynthor la rep lypa da ki nongshongshnong ka Mukroh, Borato, Saba, kiba long ki trai muluk trai jaka jong ka Elaka Shiliang Myntang.
Kine ki Karbi kim don Hali don pynthor bad da ka mynsiem atnud ia ka jingïoh khaw ïoh kba ki Pnar, ki Karbi da ka jingkyrshan ki bor District ka Karbi-Anglong Autonomous Council-Assam, ki wan rah da ki puh shilum (JCB) ban ot ïa ki lum ki wah bad ka khyndew kaba la lur da ki JCB ka tuid sha ki Hali ki Pynthor kba jong ki pnar.
U Kba jong ki Pnar uba ki rep ha ki Hali ki Pynthor jong ki u la sdang ban mih soh, hynrei pat kane ka jingleh jong ki Karbi bad ki bor Forest jong ka Karbi Anglong ban ot ban lur ïa ki lum ki wah ka long kaba i sangsot bad pangnud ban ïohi ba ïa u kba uba la sdang mih soh la tap da ka khyndew kaba tuid na kane ka jingot lum jong ki Karbi bad ka Forest Department jong ka Karbi-Anglong, Assam.
Ki Hali ki Pynthor ki nongrep ki dei kiba la ïoh patta na ka Jaintia Hills Autonomous District, Jowai, Meghalaya bad kum juh ia ki Land Holding ia ki khlaw ki btab jong ki. Haba kumne shano ki bor District jong ka Jaintia Hills bad ka Sorkar Meghalaya. Lada ki bor District ka Jaintia Hills bad ka Sorkar Meghalaya kim lah ban pynsangeh ia kane ka jingleh thombor jong ki Karbi bad ka Forest Department jong ka Karbi Anglong Assam, ban iada ia kine ki Nongrep Pnar jong ngi, imat la hap shim ia ka bor ha kti jong ki paidbah la pynpaw ki nongshong shnong.
[Kawei na ki bynta lum ba la pynlur JCB da ki nong Karbi kaba la pyntuid khyndew sha ki Hali Kba jong ki Pnar kaba dang iaid mynta]