Ka Khasi Students’ Union (KSU) ha ka 7 tark mynta u bnai ka la ioh ban kynduh ïa u Bah Pius Marweiñ, MLA ka Ranikor Constituency ban pynsngew ha u ïa ki “Arphew Tylli Ki Mat Jingdawa jong ka Seng”.
Ha kajuh ka por, na ka liang ka Seng ka la ioh ruh ban phylliew jingmut bad u MLA ka Ranikor Constituency halor ha ishu Uranium ba khih phaloh bha ha kine ki sngi namar ba u dei ruh u MLA u ba dei ïa ki thaiñ Domiasiat bad ki shnong ba marjan kaba don ïa u mar hapoh khyndew; kata u uranium.
Na ka liang ka Seng ka la pynsngew halor ka jingioh thied jaka ki briew heh spah sha ki thaiñ ba don u Uranium ba dei hapoh kane ka constituency. Ka Seng ka lah ioh ruh ban ïa kren halor ki mat pynroi ïa katei ka dong ka thaiñ kaba la shah ieh beiñ ha ka Sorkar kaba dei halor ka jingdonkam ki jaka sumar, ki skul, ka umbam umdih bad kiwei kiwei ba ki briew sha kitei ki thaiñ ki donkam bha. Ha kajuh ka por, ka Seng ka la pynsngew ruh halor ka jingwan hiar khah khah ki briew ka Atomic Mineral Department (AMD) bad ki dalal jong ka ban pyrshang ban thied bad pynsngewthuh bakla ïa ki briew ban ailad ban tih uranium bad wat ban pyntieng pynsmiej ïa ki briew kiba pyrshah ban tih Uranium.
Ka Seng ka la ban jur ruh ba lah donkam ban ban pass da ka resolution ha ka ïing Dorbar thawaiñ ha kane ka Dorbar lyiur ban wan khang ban pyni ïa ka jingpyrshah sha ka Sorkar India ban tih ïa u uranium bad ha kajuh ka por ban khanglad ïa ki briew ba wan thied jaka ba kin die pateng pat sha ki kompeni tih uranium kum ka Uranium Corporation India Limited (UCIL).