U MLA ka BJP uba long ruh u myntri ha ka sorkar MDA u bah Sanbor Shullai u la ong ba ka Bharatiya Janata Party (BJP) kan iakhun ia ka MP bye-ïlekshon ka ban sa wan ha kane ka jylla Meghalaya.
Haba kren bad ki lad pathai khubor, u bah Sanbor Shullai u la pynpaw ba ka party ka la dep ban ioh ia ki dak kiba shai na ki nongialam jong ka ban iashim bynta ha kane ka elekshon ban pynkhlaiñ ia ka jingdon jong Party BJP ha kane ka jylla.
“Ka party ka la ai dak kaba shai ba ka BJP kan iakhun ia ka ïlekshon shiteng samoi MP ”, la ong u bah Shullai.
U la pyntip shuh shuh ba katba ka jingïakren hapoh ka party ka dang ïaid shakhmat, ïa ka rai ba khatduh halor u kyrtong yn shim da ki heh jong ka party.
U bah Shullai u la ong ba u dang long kum u nongtrei party uba don ka disciplined bad u long uba kloi ban pyndep ia kano kano ka kam ba la bynshet ha u da ki nongialam.
U la bynrap “Lada ka party high command ka aiti ia nga ia kano kano ka jingkitkhlieh ne pan ia nga ban iakhun, nga long uba kloi ban kohnguh”,
Haba pynkynmaw ia ki ïlekshon kiba kham mynshwa, u bah Shullai u la ong ba ha ki por barit la ai por tang khyndiat eh ban pynkhreh bad ban ialap elekshon. Wat hapdeng kum kine ki jingeh, u la ban jur ïa ka jingdonkam ban don ka jingïatylli bad ka jinglong ryntih hapoh ka seng.
U la pynpaw ruh ka jingshaniah ba ka BJP kan rung sha ka ïlekshon da kaba pynkhreh pura ynda la sdang ïa ka jingtreikam kaba pura.
Ha kajuh ka por, kiwei pat ki seng saiñpyrthei kum ka Congress bad ka National People’s Party (NPP) ruh la khmih lynti ba kin bishar bniah ïa ki buit treikam jong ki hadien ba ki la shah pynthut ha ka ïlekshon kham mynshwa, watla ym pat shym la pynbna paidbah ïa u kyrtong da ki haduh mynta.