Ka Dorbar Shnong Golflink ha ka 8 tarik Ïaiong 2026 ka la leit ban khang tala ïa ki lad rung bad ki bynta paidbah jong ka Shillong Golf Course kaba don ha Golflink.
Kane ka jingjia ka wan hadien ba la ioh bun ki jingujor na ki nongshong shnong kiba ju leit ïaid step mynstep, kiba la kynnoh ba ka Shillong Club kaba pynïaid ïa ka golf course ka la shim pisa (entry fee) na ki paidbah ban rung shapoh ka madan.
Ki nongshong shnong ki la pynpaw ba kane ka jingleh ka long kaba pynwit bad bym burom ïa ka hok jong ki paidbah.
Na ka liang ka Dorbar Shnong Golflink, ha ka jingïalam u Rangbah Shnong Bah Michael Hek ryngkat ka jingïatreilang bad ka Seng Longkmie, Seng Samla bad ki Rangbah Dong, ki la leit ban khang syndon ïa ki lad rung paidbah kum ka jingïada ïa ka hok jong ka shnong.
Haba kren sha ki lad pathai khubor, u Bah Michael Hek u la ong ba ka Shillong Club kam dei ka trai jong katei ka jaka hynrei ka dei tang ka nongshim wai, hynrei watla katta ruh ka la pyni bor bad leh kumba ka dei ka trai. U la kynnoh ruh ba ka club ka lum pisa khlem jingmap na ki nongïaid step, watla kane ka jaka ka dei kaba paidbah bad dei ban ailad ei ïa ki nongshong shnong.
U la buh jingkylli ruh hato ka Shillong Club ka don ne em ïa ka trading licence ban pynïaid ïa kum kine ki kam, bad u la pynpaw ba ka shnong ka la dep ban ai jingthoh bad pyntip sha ka club ban ïakren halor kane ka bynta hynrei kam shym la treh ban ïashim bynta.
“Ka Shillong Club ka nang pyni bor bad pyni aiñ, hynrei ka pynkheiñ pat ïa ka aiñ shnong bad ka hok jong ki paidbah,” ong u Bah Hek, da kaba bynrap ba lada ka club ka dang ïai bteng kum kine ki jingleh, ka Dorbar Shnong kan shim shuh shuh ïa ki sienjam kiba tyngeh.
Ka Dorbar Shnong Golflink ka la ong ba kane ka rai ban khang tala ka long ban pynneh ïa ka jingbit jingbiang bad ka hok jong ki nongshong shnong, bad ka dawa ruh ba dei ban burom ïa ki paidbah bad ban ym buh jingeh ne dawa pisa na kiba leit pyndonkam ïa katei ka jaka paidbah.
