Mynta ka sngi, ka 17 tarik u Jylliew 2026, ka KSU Western Border Area Unit ha ryngkat bad ka KSU Umrit Unit, ha ka jingialam u Education Secretary ka KSU Western Border Area Unit, u Samla Shootingstar Thangkhiew, bad u President ka KSU Umrit Unit, u Samla Stoning Mawiong, lem bad ki dkhot jong ka KSU Umrit Unit, ki la leit ha ka ing sah jong u Samla (L) Paul Biswal Makri, ban ai ka jingburom bad ka jingkynmaw ieid ïa une u Samla ha ka jingdap 39 snem naduh ka jingkhlad noh jong u.
U Samla Biswal Paul Makri u dei u riew ialeh ka KSU uba la pha ia la ka jingim na ka bynta ka jingshngain ka Jaidbynriew Khasi. U samla Paul u dei na ka shnong Umrit na Western Ri Bhoi bad la kha ia u ha u snem 1971.
Ha u snem 1987 ka la don ka jingiakhih kaba jur bha ha sor Shillong ban ia khun pyrshah ia ka jingthombor ki poiei Nepali kiba la shoh la dat ia ki samla Khasi, knieh ia ki jaka puta ki Khasi bad leh be-i-jot ia ki kynthei Khasi. Ia ka jingiakhih la pynlong da ka KSU hapoh ka jingialam u Bah Bull N Lyngdoh. U Paul Makri u dei u volunteer ka KSU bad ha kato ka por u sah wai ha Jaiaw ha iing jong i Kong (Dr.) Garod.
Ha ka 15 bad 16 tarik u Jylliew ki pulit CRPF ki la synreit kuli pathar ia ki dkhot ka KSU bad ki paidbah ha kylleng ka sor Shillong ha kaba bun ngut ki la mynsaw jur. Wat hapdeng ka jingpyntieng kohtympan ki bor sorkar da ki suloi, ki dkhot ka KSU bad ki paidbah kim shym la kynran dien bad iai bteng ia ka jingiakhun ha ka sngi kaba bud kata ka 17 tarik u Jylliew.
Ka 17 tarik ka dei ka sngi kaba sngewsih ia ka iing ka sem u Biswal Paul Makri ha kaba ki pulit CRPF ki la synreit kuli ia u bad ia kiwei ki paidbah ha kaba bun ngut ki la mynsaw bad ar ngut ki la kyllon iap hajuh kynthup ia u Paul.
U Iskai Makri, u paralok ba ia sah lang bad u Paul Makri u la iathuh kumne:
“Ka don ka jingiakhih kaba shyrkhei bha ha Mawkhar bad Motphran. Nga bad u Paul ngi leit ban iakhun pyrshah ia ki Nepali bad ki CRPF ha Motphran. Hadien kane jingiakhun kaba la neh katto katne por, ki pulit CRPF ki la sdang ban wan da ki trok bad load ia ki rifles ki jong ki. Nga ong ia u Paul Makri ia phet noh namar kine ki CRP kin sa siat, u Paul u pyneh bad u ong pynban ngam salia ban iap na ka bynta ka ri bad ka Jaidbynriew. Hadien kane nga la ran kham shadien bad u Paul Makri u iakhun beit shakhmat. Sa kham shiphang nga leit khot biang ia u Paul hynrei u kyntait war bad ong biang ba ngam salia ban iap. Nga leit khot biang sa shisien hynrei u Paul u pyneh hi triang bad ong ba um tieng ia ka jingiap”
U Biswal Paul Makri u la shah synreit kuli pathar ha ki CRPF haduh ba ka khlieh jong u ka la pra phum bad kyllon iap ha madan thma. Ha ryngkat u Paul, uwei u daju Khasi na Smit u bym don bynta ha ka jingiakhih u la shah bat ha ki CRP ha iewduh bad u la shah bom shah tied bad shah siat iap.
Ha kane ka por u samla Paul u dang don ha ka rta kaba dang lung ha kaba u dang 16 snem. U dang don ha ar tylli ki jingpule, kata ka jingpule klas 9 ha Government Boys School bad ka jingpule Karate ha YMCA ha ka White Belt.
Ka jingiap u Paul Makri ka la pynkyndit bynriew ia ki nongshong shnong ka Western Ri Bhoi kaba la jyllei da ki poiei Nepali. Ki paidbah ki mih shnong ban beh krad lut ia ki Nepali bad ka Western Ri Bhoi mynta ka la dei ka thaiñ kaba ia shong ia sah tang para Khasi.
“You can kill me but you cannot kill the movement”
