Lashai 9 tarik yn pynkut ïaka Behdieñkhlam ha Jowai
Ka lehñiam shad Behdeiñkhlam jong ka Seiñ Raij Jowai kaba la long mynta ka sngi ba lai (Musiang), ka la long kaba ïaidbeit ïaid ryntih hapdeng ka jingiphuh iphieng ha kaba naduh ka por mynstep kala don ka jingpynïeng ïa ka Deiñkhlam ka ‘Bon” haka jaka ba ki khot ka ïong Rngad Wah (Khonraij) bad ka Deiñkhlam ka Doh ha Iung Langdoh.
Hadien kane ki khon Raij kila leit rah ïa ka ‘Symbood Khnong’ na Loom Sooiung ban leit pynïeng ha khlieh shnong (Chilliang Raij). Katba ha ka por shiteng sngi ki Kmai Raij kila pynlong ka jingïakynduh ha Mynkoi Pyrdi (Iaw-Iongpiah) ban pynhiar ïa ki bom ki Bhuri, bad leit sha ka jaka Datlawakor kumjuh sha ki baroh ki jaka ñiam ha Iawmusiang.
Nangne ki khon ka Raij kila leit pynpoi ïa ka ‘Khnong Blai’ ha madan Poh Sawiar khnang ba u Dolloi un ai ka pyrnah Khnong Blai ha u Kñi Nikhla ban pyndep ïa ka ñiam ka rukom da ka nguh ka dem bad ka ‘suit ka choor’.
Hadien ba la dep ka nguh ka dem ki khun ka Kmai Raij ha ryngkat ki kynthei bad ka riam ka beit kiba wan ban ïasynran lang ha Iawmusiang kiba bud nadien la leit rah ïa ki Deiñkhlam sha ki dong jong ki ban pynïeng ha rangkat ki Bom ki Bhuri bad ka shad ka kmen. Katba ki Khun ka Raij kila leit rah ban pynpoi ïa ka ‘Khnong Blai’ ha Madan Moosyiem ha kaba u Pator ula pynkhamti ïa ka kiad ha u Kñi Nikhla ban pyndep ïa ka nguh ka dem
Lashai kaba dei ka ‘Muchai’ 9 tarik ka sngi pynkut jong ka lehñiam Behdeiñkhlam ka Seiñ Raij Jowai mynta u snem ha kaba yn wanrah ïa ki rong ki rup ba la shna kyrpang na ki dong bapher bapher bad ki Raij hapoh ka pung jong ka Syiem Aitnar bad kumjuh ïa ka Symbood Khnong bad ka ‘Khnong Blai’. Katba ha ka por janmiet kan don ka Datlawakor hapdeng u Langdoh bad u Sangot Paswet.
