U bah Ardent Miller Basaiawmoit uba dei u President Rangbah jong ka Voice of the People Party (VPP) ha ka jingkren jong u mynta ka sngi 5 tarik ha Stand Ummulong, Iawmusiang Jowai ula ong ba ka party (VPP) kala mih shakhmat ban hikai ïa ki paidbah ba kim nym shah tied ha ki por Election.
U bah Ardent ula ong mynta ‘ym lah shuh ban thied ïa u paidbah kumba thied Sohphlang bad Jamyrdoh’ ha ki por Election namar ki paidbah kila stad da ka jinghikai ka VPP, shiphew snem mynshwa ki heh spah kim don por ban ïa kynduh paidbah hynrei mynta kila leit sam skim kylleng kylleng.
Shuh shuh ula ong ka VPP ka mih ban ai ha u paidbah ïa ka jingstad bad ka jingshemphang khnang ba kin nym beit shuh, ka ai jinghikai ruh ïa ka jaitbynriew ban don ka jingïatylli bad ka jingshngaiñ ban ïeng ha la ka jong ka hok
Ula pynsngew jia aiu ha kane ka election bala dep, ka VPP kala kurup ïaka bor synshar ha KHADC, katba ha JHADC ngi don pat ha ka liang pyrshah kaba khlaiñ, da kaba ong ka jingdon ki MDC kaba la wanrah ka jingkylla wat haka rukom shong Dorbar kala kynjoh sha ka 5 kynta tam bad ka party ka ai khublei ïa ki para MDC na Jaiñtia.
Ula kynnoh ïa u MLA ka Nartiang uba dei u Symbud Myntri Rangbah ka sorkar jylla halor ka rukom treikam jong u mynta, tang namar ba tieng ïa ka VPP ula leit sam skim manla ka taïew, wat ki paidbah ka Nartiang kila pynsngew ba kane ka jingai jong u ka long tang na ka bynta ka san snem na ki 15 tylli ki snem kum u MLA, la ong u bah Ardent.
Kumba long mynta kiwei ki Party kim kwah ïa ka VVP ban pynlong jingïalang ha ki jaka paidbah kum ha ki jaka ïew, namar ki tieng ba ki paidbah kin ïoh jinghikai shaphang ki skim bad ka kamram u nongmihkhmat, da kaba ong ki jinghikai jong ka VPP sha ki paidbah kila buh jingthut ïa ki nongïalam (MLA) kiba don bynta ha ki kam contract.
Haba pynshai ïa rukom treikam ka VPP “ula ong ka Party kam ju kynthoh briew, hynrei ka mih shakhmat ban pynshai sha ki paidbah khnang ban bym shah ïalam bakla”.