Katba nangmih ki sngi ka Party National People Party (NPP) ha Rilum Jaiñtia ka la nangkhlaiñ nangkhlaiñ da ka jingwan rung Party NPP jong ki briew. Ia kane la lah ban sakhi da ka jingrung party jong kiba bun ki briew napoh ka 2 Jowai Assembly Constituency bad nawei khamtam ka jingrung party NPP jong u Waheh Daniel Dan, u Kyrtong ka Seng Indian National Congress (INC) uba la ia khun ia ka MLA kaba dang shu dep na ka Party Congres, u Waheh Lasting Suchiang uba la ia khun ha ka kane ka MLA kaba dang shu dep na ka Indian Trinamool Congress (ITMC) na ka 4 Mookaiaw Assembly Constituency, Waheh Nahimaya Tyngkan u Kyrtong ka seng Congres na ka 4 Mookaiaw Assembly Constituency, u Ma Kreson Langstang MDC, uwei na ki Nongialam bakhlaiñ jong ka Bharatiya Janata Party (BJP) na ka Sutnga Saipung Assembly Constituency ha ka jingialang kaba heh jong ka party kaba la long ha Ladthadlaboh Indoor Hall, Jowai hynne ka sngi (02/04/2024).
Ia kane ka jingialang kaba heh jong ka Party ban pdiang burom ia ki Nongrung sha ka National People Party (NPP) la pyniaid da u Working President jong ka Party u Ma Wailadmiki Shylla MLA. Ha kane ka jingpdiang burom jong ka party NPP ia ki Nongrung Party la wan sakhilang da u Conrad Kongal Sangma, National President uba long ruh u Myntri Rangbah ka Jylla Meghalaya, ma Sniawbhalang Dhar, National General Secretary jong ka NPP uba long ruh u Symbud Myntri Rangbah ka Jylla, Bah Prestone Tongsong, President jong ka State National People Party, ma Comingone Ymbon MLA uba long ruh u Myntri sorkar Jylla, Kong Santa Mary Shylla MLA, ma Thombor Shiwat District President NPP West Jaiñtia Hills District uba long ruh u Chief Executive Member jong ka JHADC, ki MDC jong ka Party bad kiwei de ki riewkhmat jong ka Party napoh ka Rilum Jaiñtia.
Ha kane ka jingialang la ioh ia ka jingkren pdiang burom ia baroh da ka kong Santa Mary Shylla bad shwa ban ioh ia ka jingkren na u ma Comingone Ymbon, na u ma Sniawbhalang Dhar, na u Bah Prestone Tongsang bad na u Conrad Kongal Sangma, la ioh ia ka jingkren lyngkot na u ma Daniel Dan, ma Nehemayah Tyngkan, ma Kreson Langstang bad ma Lasting Suchiang ki Rangbah kiba la rung sha ka Party NPP. Kine ki Rangbah haba kren ha kane ka jingialang kipynpaw ba ki rung sha ka Party NPP naba ha ka jingiohi jong ki ym don da kawei pat ka party kaba shimkhia ia ka roi ka par hapoh ka Jylla laitnoh ka Party NPP bad ki kyntu ruh ia kiwei kiba ym pat pynrung ialade sha ka NPP ba kin pynrung ialade ban pynkhlaiñ ia ka party ba kan nangkhlaiñ bad ai mynsiem ia ki Nongkitkam jong ka Party ba kin nagtrei shitom shuh shuh na ka bynta ka roi ka por ka bha ka miat ki nongshong shnong jong ka jylla. Ha ka juh ka por kine ki Rangbah ki kyrpad ruh ia ki Paidbah ka Rilum Jaiñtia bad ia ki Nongshong shnong jong ka 1-Shillong Parliamentary Constituency ba kin kyrshan tyngeh ia ka kong Mazel Ampareen Lyngdoh ka Kyrtong MP jong ka Party ha kane ka elekshon ba kan ioh ia ka jingjop kaba don burom.
