Ka jingjied ïa ki nongmihkhmat MP sha Lok Sabha kala jan poi ka sngi thep Vote haka 19 tarik u Ïaïong, 2024, na ka liang jong ki kynhun seng saiñ pyntrei kila trei shitom ban leit ïalap Election ïala ki kyrtong la jong khnang ba kin poi sha ka thong.
Hynnin ka miet 15 tarik u Ïaïong ka kynhun jong ka seng National People Party (NPP) kala leit hiar ban ïalap Election ïaka kyrtong NPP ka kong Mazel Ampareen Lyngdon ha Loompyrdi Iongpiah, Jowai haka jingdonlang u Symbud Myntri Rangbah ka jylla u ma Sniawbhlang Dhar, u MLA ka Jowai Constituency ma Wailadmiki Shylla, ki MDC nalor kiwei ki nongïalam ba hakhmat ka Party bad ki paidbah nongshong shnong kiba la wan ban sngap ïa ka nongrim jong ka Party NPP.
U ma Sniawbhlang Dhar ha ka jingkren ula pan ka jingkyrshan na ki paidbah nongshong shnong ka sor Jowai ba kin pynjop don burom ïaka kong Ampareen Lyngdoh na ka seng NPP, da kaba pynsngew ba kino kino ki kam pynroi hapoh ka sor Jowai ki don jingïadei bad ki skim kiba wan beit na ka sorkar kmie naduh ka Mini Secretariat, ka Iawmusiang ïa kaba ka sorkar mynta kala pynbeit ban pynioh da kawei pat ka skim ba thymmai namar kaba rim kam poi shano shano.
Kumta u kyntu ïa ki paidbah ka sor Jowai ba kin ai ka jingkyrshan ba pura ïa ka kong Ampareen, khnang ba ka rukom treikam kan long kaba khamsuk. Ha ka juh ka por ula pynsngew ïa ki skim bapher bapher kiba ka sorkar jylla hapoh ka jingïalam ka NPP kiba la pyntreikam mynta bad kiba dang pyntreikam kumjuh ha kylleng ka jylla.
Shuh shuh ula pynsngew ba ka Election MP mynta u snem ka long kaba kham pher bad shong shit namar ka jingmih ka Party thymmai ka VPP kaba la pynshitom ïa kiwei de ki party ban trei shitom.
Ula kren shaphang kiba bun na ki kynhun seng saiñ hima sima ki don ïala ki jong ki jong ki mat ba hakhmat ban trei na ka bynta u paidbah, hynrei ka VPP pat ka kren tang ïa ka kyntien jaitbynriew bad ka dei ruh ka Party kaba sngewhok bad kane ka long kaba la bakla lypa.
Kumta u kyntu ba ym dei ban shah pynbeit ha kane ka Party VPP, namar ka dei ka Party kaba la paw na ka daw ka Reservation Policy, hynrei haka jingïalap Election MP jong ki mynta kim nud shuh ban kren ha rynsan tang shi kyntien shaphang kane ka Reservation Policy.
U MLA ka Jowai ma Wailadmiki Shylla u buh ka jingkypad ïa ki paidbah ban ai ka jingkyrshan ba pura ïa ka kyrtong MP jong ka National People Party (NPP) da ka jingïatreilang khlem ka jingsngew Party naka bynta ban pynphuh pynphieng ïa ka sor Jowai baroh kawei.
Ula ong kum u MLA ula pyrshang ban buddien ïa ki kam kiba sah teng bad kaba sngewkmen mynta ïa ka projek Um bam na ka wah Umngot la lah ban pynpoi mynta sha sor Jowai kaba la angnud la slem bha da ki paidbah ka Jowai, ka jingkieng hajan ka Thomas Jones kaba la sah teng da ki bun snem la lah ban pyndep ïa ka.
Ula pynsngew ha kine ki snem bala dep ka Jowai Municipal Board ka kynduh shibun ki jingeh namar ka jingbym biang ka tulop hynrei mynta kala kiew shakhmat haka rukom treikam wad ïa ka tulop ruh kala ap hashaw ban kut u bnai.
Ha kaba ïadei bad ka Wah Myntu ula ong ba ka sorkar lyngka ka jingbthah jong ka NGT la lah ban shna ïa ki nala um ne ki in-situ kaba la kot 18 klur tyngka. Ha ka liang ka pule puthi ruh hapoh Kiang Nagbah la sdang ïaka B.Ed College, ïa ka Thomas Jones la ïarap pisa lang bad ka sorkar ban siew tulop ïa ki nonghikai (Lecturer), wat ïa ki surok ha kylleng ka sorkar Jowai la dep ban shna lut ïa ki kaba la pynsuk mynta ïa ka leit ka wan jong ki paidbah.