Ha ka jingiphuh iphieng la pynkut iaka lehniam shad Behdeiñkhlam jong Seiñ Raij Sohkymphor kaba juh long shisien shisnem mynta ka sngi, 11 tarik Nailar 2026, ha Madan Shongniah Sohkymphor, East Jaiñtia Hills District.
Ha kane ka sngi, la wan sakhi lang u Symbud Myntri Rangbah ka Jylla Meghalaya, u ma Sniawbhalang Dhar; u MLA ka Khliehriat, u ma Kyrmen Shylla, u Dolloi ka Elaka Jowai, ma Puramon Kynjing, ki nongïalam jong ka Seiñ Raij Sohkymphor bad Seiñ Raij Tuber, ki katto katne ki Rangbah Shnong na East Jaiñtia Hills, ki nongshong shnong na ki shnong kiba marjan, ki khynnah, ki samla bad ki tymmen, ryngkat bad ki ophisar jong ka district. La sakhi ïa ki rukom lehniam, dustur bad kolshor tynrai jong ka Jaiñtia Hills.
Kumba shiphew tylli ki jingshna “Rong bad Rot” na ar tylli ki shnong ki long kiwei na ki mat ba kongsan jong ka Behdeiñkhlam mynta u snem kiba la wanrah sha ka jaka ba pynlong ia ka jingnoh Rot.
U Symbud Myntri Rangbah, u ma Sniawbhalang Dhar, uba long u kongsan, u la ong ba ka jinglehniam ka long kaba heh bad kaba iphuh iphieng watla tang khyndiat ki shnong ki la wan ïashim bynta. U la kdew ruh ba ki tymmen, ki khynnah bad ka imlang sahlang baroh ki la wan lang ban rakhe ïa kane ka jingïalehniam.
Haba ïanujor bad ka por kaba shiphew snem mynshwa, u la ong ba mynta ki nongwan ïashim bynta ki long kiba burom bad shimkhia. U la ong ba mynshwa bun ki briew ki ju wan da ka jingbuaid bad kane ka pynlong ia ki kynthei ba kin sheptieng ban ïeng hajan ki shynrang kiba la buaid, hynrei mynta u snem ym shym la don kum kine ki jingjia.
U ma Dhar u la pynpaw ruh ba ki briew na ki ñiam bapher bapher, kynthup ïa ki paid Katholik bad Presbyterian, ki la wan bad ïadon bynta lang ha kane ka jingïalehniam. U la ong ba kane ka jingïadon lang jong ki paid niam bapher bapher ka long ka jingitynnad jong ka kolshor jong ki bad ka long ruh ka lad kaba kongsan ban pynroi ïa ka jingïaburom iwei ïa iwei pat.
U la ong ruh ba kum u nongïalam, baroh ki long kiba ïaryngkat ha khmat jong u bad u la ong, “Nga la kha ban shakri.”
U la pynbna ruh ïa ka jingïarap kaba T. 15 lak sha ka jingpynroi ïa ka Biar Aitnar jong ka sein Raij Sohkymphor bad u la kyntu ïa u MLA ka thaiñ, u ma Kyrmen Shylla, ban ïarap ha kaba pyndap ïa ki jingdonkam kiba dang sah.
U symbud kongsan, u ma Kyrmen Shylla, u la ai jingïaroh ïa ki sienjam kiba la shim da u Symbud Myntri Rangbah, u ma Sniawbhalang Dhar, ha baroh ar tylli ki district jong ka Jaiñtia Hills.
U ma Shylla u la kdew ba kane ka jingïalehniam ka dang long ha madan phutbol, bad u la kyntu ba ka Seiñ Raij Sohkymphor kan pynïoh ïa ka jaka kaba kyrpang bad ki jingtei kiba biang ban pynlong ïa ka Behdeiñkhlam man la u snem.
U ma Shylla u la pynpaw ïa ka jingkyrmen ba ka jingïarap jong u ma Dhar kan ïarap ban pynroi ïa ka Biar Aitnar, bad u la kular ruh ban ai ïa ka jingïarap katba u lah.
