U MDC ka Barato-Mukroh u ma Aiborlang Shadap, ban pynkhlain ia ka National People Party Youth Wing jong ka 12- Barato-Mukroh Constituency, u la pynialeh syndon da ka football tournament kaba la ai kyrteng “Aiborlang Shadap Knockout Football Tournament 2026”. Ha kane ka tournament, la wan iashim bynta da ki 30 tylli ki team bad ia ka final la pynlong ha kane ka 8 tarik mynta u bnai ha madan pynthor Barato, ha kaba u ma Sniawbhalang Dhar, Symbud Myntri Rangbah ka jylla u long u kongsan bad u Ma Thomborshiwat, C.E.M, JHADC u long u Symbud kongsan.
Ha kane ka jingialeh phainal ki team kiba ialeh ka long ka Psiar Sports Club bad ka Barato C (Lum iaw Barato). Ha shwa ban sdang ka jingialeh phainal, la pynlong shwa da ka jingialehkai paralok (Friendly match) ka 2 Jowai bad ka 4 Mookaiaw ha kaba ka 2 Jowai ka la pynbam da 6 kol la 0 ia ka Mookaiaw.
Ha shwa ban sdang ia ka jingialeh hapdeng ka Psiar Sports Club bad ka Barato C (Lum iaw Barato) la pynlong ia ka jingialang kaba lyngkot ha kaba la ioh ia ki kyntien kyntu kynrong da u kongsan ma Sniawbhalang Dhar.
U ma Sniawbhalang haba kren ha kane ka sngi u ong ba na ka liang jong u bad ka Sorkar ka la shimkhia ha kaba kyntu kynrong ia ki khun samla ha ki kam sports bad u ong kino kino ki nongialehkai kiba wanrah medal kiba wanrah burom ia ka distrik bad ia ka state ka kam sorkar ka la ap lypa ia ki.
Ha ka sneng ka kyntu ia ki nongialeh phainal u ong ha ka jingialeh don kiba jop bad don kiba rem bad kiba jop kim dei ban sngewsarong bad kiba rem ruh kim dei ban sngewrem bad nangpyrshang shuh shuh ban ioh jop ha ki jingialeh ki ban dang wan.
Ha kane ka jingialeh phainal la jop da ka Psiar SC ia ka Barato C, da ka tie breaker bad ka la ioh rah ia ka song pisa kaba Rs.50 hajar bad kaba Barato C ka la ioh rah ia ka song pisa kaba Rs.30 hajar.
Ha kane ka sngi la wan ban sakhi lang ia kane ka jingialehkai phainal da u ma Warmanship Shadap, MDC ka Mowkaiaw, u Prof. Dr. Henry Lamin, u Doloi ka Shiliangmyntang u Kham Sariang bad kiwei de ki riew khmat jong ka thaiñ bad ka Party NPP.
