Mynta ka sngi (11/08/2026) ka Seiñ Kur Bahkhla kum ka dak jong ka jingsngewkmen halor ka jingjop jong ka Dakahi Kyndiat ïaka kyrdan ba nyngkong jong ki kynthei haka ‘World Championship 100 Km Ladakh Trial to Heaven 2026’, ha kaba la pynlong ïa ka jingpynkup burom ïaka ha Café Central kaba don ha Mooralong Jowai.
Ïa ka jingïalang la pynïaid da u President ma Leningstar Rymbai, ha ka jingdonlang u Adviser ka seng Kur u ma Lasky Rymbai uba dei ruh u Deputy CEM ka JHADC, nalor ki nongïalam na ka Seiñ Kur Bahkhla, kur Kyndait lem bad kiba ha ïing jong ka Dakahi bad la pynkup burom ïaka da ki syntiew, ka jaiñ ryndia bad ka momentous.
Naka liang ka Dakahi Kyndiat haba ai jingkren kala pynpaw ka jingsngewnguh ïa ka jingdon ryngkat U Blei naduh ba sdang ka jingleit ïashim bynta ha katei ka jingïakop ha Ladakh naduh ka 6 tarik u Nailar ha ryngkat ka jingkyrshan bad ai mynsiem jong kiba ha ïing ha sem.
Kala ong kane ka jingïakop mareh kala long kaba eh bha ha kaba hap kiew ïa ki lum ki wah (high attitude) ha ka jingjrong kaba 5900 miter location bad kaba shitom bha ban ring mynsiem, haka juh ka por kin hap kiew haka por mynsngi bad ka por ban poi sha ka thong la buh hapoh 30 kynta.
Kala ong katkum ka plan jong ka ban pyndep ïa kane ka jingïakhun ka dei ban long beit ha ka 7 tarik haka por 8 shiteng, hynrei haka por ba kiew ïa u Lum kala jah lynti haduh 4 kilo meter katkum ka jingkheiñ ka long 1 kilo miter haka 28 minit, ynda kala pyrshang ban wat lynti biang lyngba ka baje GPS kala lap biang ïa ki para ba ïaphet lang ki ba dang shu poi.
‘Katba ki dang kiew sa ki bynta ba khadduh jong ka 5900 miter location kiba ïadon sa tang 8 ngut hynrei kiba bun na ki kila ïoh kem pang (altitude sickness) nalor sa ka jingjur u slap bad ka lyer kaba la pynklumar lang ïa baroh’ kala ong.
Hashwa ban poi sa ka bynta ba khadduh da kaba hap hiar haka jingjngai kaba 5 kilo miter kila hap ban kynduh jingeh da kaba hap jam sha shilliang haduh 18 sien ïa ka juh ka wah bad kala pyndep noh haduh ka por 2 shiteng mynstep kaba kot 28 kynta na ka 30 kynta bala buh.
Napdeng ki 84 ngut kiba ïa mareh tang 4 ngut kiba lah ban pyndep haka 100 mile namar ka jingeh jong ka jaka, kaba pynpaw ka jingainguh ïa ka jingdonlang jong u Blei Bahkhla ban pyndep ïa kane ka jingïakop jong ka kaba don ïaka kyrdon jingjngai kaba 35km, 100km, bad 100 mile (158km).
Shuh shuh kala pynsngew haduh mynta ka dang sngewtynnad ban phet namar ïa kane ka jinglong kala sdang naduh ba ka por ba dang rit, haka jinglong samla bad haduh mynta kala trei kum ka Pulit jong ka jylla, kala ai mynsiem ruh ïa kiwei ba ki bud ïa kane ka nuksa khnang ban kiew ka kur ka jait bad ka shnong ka thaw hi baroh kawei.
Baroh ki nongkren kiba kynthup ïa ma Lasky Rymbai (Adviser), ma Laribha Kyndait uba dei u President Kur Kyndait, ma Leningstar Rymbai kila kitbok kit rwiang ïa ka Dakahi Kyndiat ka khun jong ka Kur kaba la wanrah burom ba khraw eh ïaka jylla Meghalaya hi baroh kawei. Kum ki nongïalam Kur kin pyrshang ban ïarap katba lah da kaba kyntu ïa ka sorkar ban pynkiew kyrdan ïa ka haka kyrdan pulit ba ka trei.
Kum ban shu phai ka Dakahi Kyndait ka dei ka khun jong ka kong Roithai Kyndait bad u ma Kmenlang Phawa na ka shnong Mukhaialong, East Jaiñtia Hills Dstrict bad ka dei ka khun ba nyngkong na ki 11 ngut shi para.
