Ka Directorate of Civil Defence & Home Guards, Meghalaya, ka la pynlong ia ka Mock Exercise halor ka Air Raid bad Blackout kaba la ai kyrteng “ARMEX-I 2026” ha kylleng ki district jong ka jylla, kumjuh ha nongbah Shillong ha ka 24 tarik u Risaw 2026.
Ia kane ka Mock Exercise la pynlong ha ki ar bynta. Ka bynta ba nyngkong ka kynthup ïa ki jingpynwandur ïa ki kam wad bad pynlait im, ka jingpynkynriah briew, bad ka jingpynkhreh ïa ki nongsumar, katba ka bynta ba ar pat ka long ka jingsngap ia ka jingpynpah ia ki siren bad ka jingpynlip bording.
Ia ka bynta kaba nyngkong la pynlong naduh ka por 3:00 PM haduh 4:00 PM. La pynsawa ïa ka siren jong ka Civil Defence ha ka por 3:00 PM ha baroh ki district ban ai dak ïa ka jingsdang jong ka Mock Exercise bad ban leh kum ka jingshahhiar thma na suiñ. Ha ka por 4:00 PM la pynsawa biang ia ka siren ban pyni ia ka dak “All Clear” bad ka jingpynkut ia ka bynta kaba nyngkong.
Ia ka bynta kaba ar la pynlong ha ka por 6:59 PM hadooh 7:02 PM. Ha ka por 7:00 PM la pynsawa ïa ka siren jong ka Civil Defence ban ai dak ïa ka jinghiar thma na ki liengsuiñ bad ka jingsdang jong ka jingpynlip bording. Ka jingpynlip bording ka la neh ar minit bad la pynkut noh ha ka por 7:02 PM da ka jingsawa jong ka siren “All Clear”, kaba pyni ia ka jingkut jong kane ka Mock Exercise.
