Ka Hynniewtrep Youth Development Council (HYDC), East Khasi Hills District ha ka 15 tarik Jylliew 2026 ka pynpaw ïa ka jingsngewkhia kaba jur halor ka jingpyndonkam bakla ïa ki dukan, ki ba don ha MUDA Shopping Complex, Police Bazar, Shillong.
Ha ka jingleit jurip ka HYDC East khasi hills hapoh ka jingialam u President bah Francis Sohtun, u la ong ba katkum ki kot ki sla kiba la ioh da ka seng, lyngba ka RTI, ka Meghalaya Urban Development Authority (MUDA) ha ka 5 tarik Nohprah (December) 2003 ka la pynmih ïa ka Advertisement , kaba khot ïa ki samla khlem kam khlem jam ban apply ban ioh shong dukan ha ka tei ka complex. Ha katei ka jingpynbna la kdew shai ba ki application dei ban long katkum ka prescribed form bad ban ïoh jingïamynjur na u local MLA.
Na kine ki kot ki sla, la shem ba bun na kiba ioh ia kitei ki dukan dei ki Khasi, hynrei ha ka por ba leh ia ka survey kaba nyngkong u bah Francis u la ong ba, ha ba scan ia ki scanner ne ki qr code ki ba don ha dukan, la shem ba ka jing ia die ia thied ka dei beit ha ka account Jong ki dkhar kiba ap dukan hangto hi, hynrei ha ka survey kaba ar la shem ba ki ne ki dukan kim shem la pyndonkam shuh ia ki scanner ki jong ki hynrei ki la ong, ba ki pyndonkam beit tang da ka pisa. Ka ei kaba pynsngew lyngngoh ia ki nongialam jong ka seng ka long ba mynta hi, wat ki nong die kwai ruh kila pyndonkam da ki qr code bad scanner bad ia die ia thied, te ka ei kaba pynlong ia kine ki dkhar ban ym pyndonkam shuh da ki qr code lane scanner.
Ka Seng ka buh jingkylli, hato ka MUDA kan leh kumno ia ka jingthmu ka jong ka ban ai kam ai jam ia ki unemployed Youth jong ka jylla.
Hato kane ka advertisement ba la pynmih ha u snem 2003 ka dei tang ban shu tap eit miaw,
hato ka ain Benami act ka trei kam ne em ha Meghalaya.
Hato ka sorkar kan ailad ban ioh kam ki samla khasi ne ban ioh kam ki mynder.
Hato ka sorkar kan pynbeit ia ka ei kaba la bakla ban biang ban bit ki khun samla ha liang ki kam ka jam.
Ka HYDC ka ngeit skhem ba ka sorkar kan shim khia ia kane ka kam, bad shen ka seng kan sa submit ia ki kyrteng ki ba ioh ia ka allotment bad ia ki trai nongdie kiba don ha madan bad ban leit dawa na ka tnat MUDA ba ka dei ban leh ia ka enquiry bad leh daka ba tyngeh ha kaba ia dei bad ka jing ia leh tuh ha ki kam ai wai ia ki dukan ha muda.
Kane ka long ka katkum ka kyrwoh khubor na u President ka HYDC East Khasi Hills District u Bah Francis Sohtun.
