Ka Meghalaya Commercial Truck Owner and Drivers Association (MCTODA) Jaiñtia Unit mynta ka sngi Balang 25 tarik u Lber kala pynlong ïa ka jingïalang ha Mihmyntdu, ban ïakren halor ka RTI bala ïoh pdiang na ka JHADC bad la lap haduh 43 tylli ki Transporters bar jylla.
Naka liang u nongaiktien MCTODA Central Body u bah Wanchwa Nongtdu hadien ka jingïalang haba pynsngew ïa kane sha ki lad pathai khubor hadien ba ka seng haba ïohi ïa ka jingkyrduh kam ki trai jylla, kala dep ban file ïaka RIT napoh ka JHADC ha kaba ïadei bad ka kit ka bah jong ki trok bad la lap pynban baroh ki Transporter bar jylla ki don haduh 43 tylli.
Na kine ki 43 tylli ula pynsngew ïaka jingeh haba uwei u Transporter u buh 50 tylli ki kali (trok), lada kheiñ 43 tylli ki Transporter kala poi sha ka 2150 tylli ki trok.
Shuh shuh kaba pynsngewsih ïaka seng ka long haka por ba pynlong jingïakhih ka MCTODA ha Mawryngkneng, ka sorkar kala khot ïaka jingïakren ban pynbeit ïa kane ka kam bad la pynïoh tang mar 40 tylli ki kali na ka bynta ki 3 tylli ki Association kata ka JHTOA, EJHTOA bad ka MCTODA.
Lada kheiñ ïa ka jingïoh haba ïa nujor bad kitei ki 2150 tylli ki trok jong ki Transporter bar jylla kiba pynïaid ha ki kharkhana dewbilat, hynrei na kitei ki lai tylli ki seng ka jingïoh kit mar jong ki ka poi duna ïaka 6% percent bad kane ka la pynsngewsih bha ïa ki trok trai jylla.
Da kaba kdew ruh ïa ka jingeh ban leit kit ïa ki mar na ki kharkhana tang 4 trip haka shibnai bad kane kala ktah eh ban siew ïa ka Instalment jong ka bai thied kali bad kiba bun ki trok kila shah tan ha ki Bank, ula ong kine ki 2150 tylli ki trok jong ki bar jylla kila wan ban kjit syndon ïa ka spah ka phew bad ban pynduh bam ïa ki nongshong shnong ka bri u hynñiewtrep.
Na ka liang ka seng kala rai ban shim da ka sien jam kaba tyngeh namar ïa ka spah jong ki trai jylla la wan kjit da ki bar jylla.
Haka juh ka por la kyntu ïa ka Council ba kin peit bniah ïa kane bad ban pynsangeh mardor ïa jingpynthymmai ïa ki Trading licenses jong ki bar jylla, namar wat hapoh ka ïing Dorbar ka EC kam shem la ai jingpynshai bniah haba kylli ki MDC halor kane ka kam.
Shuh shuh ula ong kaba sngewsih ïa ka seng ka long wat ïa ka RTI bala ai daka JHADC la pynïoh tang da ki dak thoh kti bad ki bym shai ban pule.